BIDASOA: Zubiria, Mouriño (7), Martínez (1), Crowley (3), Villar (3), Odriozola (6), Muiña (2). Dejanovic, Cavero, Vázquez (7), Beltza (1), Portero (2), Azkue (2), Bezbradica (1), Davidovic.

NAVA: Miranda, Domínguez, Juárez (5), Virseda, Villagrán (4), García (4), Camino (1). Simón (1), Campillo (2), Ajo (6), Rasero (2), Rodríguez, Cabada, Alberto García (1).

MARKAGAILUA: 3-1, 6-5, 8-7, 10-10,13-12, 17-14 (atsedenaldia); 22-16, 24-20, 26-22, 29-22, 33-24.

EPAILEAK: Amigo Plaza eta Espadas García de la Galana.

Baikortasuna kutsatu zuen Bidasoa-Irunek Artalekun egindako lehen agerraldian. Zarauzko garaipenari jarraipena eman zion larunbatean, Nava mendean hartuta. Igoera fasea jokatu zuen Segoviako taldeak joan den urtean. Aurten ere, lehia horretan ibiltzeko indarra duela erakutsi zuen Artalekun. Estu hartu zuen Bidasoa lehen zatian. Fernando Bolearen taldeak ez zuen defentsako harresi tinkoa osatzea lortu. Zirrikituak utzi zituen, eta Navak ez zituen alferrik galdu. 16.minutuan hutsartea eskatu behar izan zuen Boleak, jarraibideak emateko (8-8). Taldeak ez zituen zuzenketak berehalakoan barneratu, 20.ean 10-10ekoa baitzen markagailua oraindik. Ondorengo minutuetan, Kauldi Odriozolak hartu zuen markagailua desorekatzeko ardura. Zumaiarrak egin zituen Bidasoaren hurrengo lau golak. Vazquezek borobildu zuen segida, eta hiruko abantaila hartu zuen etxeko taldeak (15-12). Errentari eutsi zion atsedenaldira arte.

Bigarren zatiko lehen bost minutuetan, neurketa apurtzeko ahalegina egin zuen Bidasoak (23-16). Navak ez zuen horren goiz amore eman nahi izan. Lehen olatu kolpea gelditzea lortu zuen, Boleari hutsartea eskatzera behartzeraino. 44.minutuan, 24-21ekoa zen markagailua. Baina orduan amaitu zen Navaren erreakzioa. Bigarren bolada bortitza izan zen. Dejanovicen ateari giltzarrapoa jarri zion Bidasoak, Markel Beltzak gidatutako defentsari esker. Erasoan, ikuskizuna eskaini zuen Bidasoak, joko bizkor eta mugikorrarekin. Gastón Mouriño pibotea bapo gelditu zen lehen lerroko jokalariek eskura jarri zioten baloi sortarekin. Navak hurrengo gola egiterako, 33-22koa zen emaitza. Gainditu ezineko aldea. Amaiera erosoa izan zuen neurketak Bidasoarentzat. Jokalari guztiek parte hartu zuten, taldearen maila murriztu gabe. Baliabide sorta zabala du aurten Artalekuko taldeak. Baditu osagaiak.