Adela elkarteari bideratuko zaio zazpigarren edizio honetan biltzen den diru guztia

Beñat Elzo mendi lasterketa bueltan izanen da azaroaren 1ean. Bi urtez ospatu ezinik egon ondotik, korrikalari hondarribiarraren omenez egiten den lehiaketa honek bere zazpigarren edizioa ospatuko du aurten. Gainera, bertan biltzen den diru guztia Adela Gipuzkoa elkarteari bideratuko zaio.

Zazpigarren aldiz antolatu dute aurten Beñat Elzoren omenezko mendi lasterketa. Azaroaren 1ean ospatuko dute eta, urtero bezala, hiru proba mota eginen dituzte. Goizeko 9:00etan oinezko ibilbidearekin emanen diote hasiera egunari. Lehendabiziko proba honetan lasterketaren ibilbide bera osatuko dute partehartzaileek eta jende guztiarentzako irekia egonen da. 11:00etan berriz, proba nagusia ospatuko da. Hamar kilometroko mendi lasterketa izanen da, Higer itsasargian bukatuko dena. Azkenik, 12:30ean haurren probarekin bukatuko da jardunaldia. 1,5 kilometroko ibilbide laua osatuko dute hauek.

Izen-emateak irekiak daude dagoeneko www.kirolprobak.com webgunean eta epea larunbatean (urriak 29) itxiko da. Lasterketan biltzen den diru guztia gainera, gaixotasun arraroen elkarte bati bideratuko zaio, betiko moduan. Aurten, hain zuzen ere, Adela Gipuzkoa Alboko Esklerosi Amiotrofikoaren elkarteari emanen zaio.