Gure Txokoak ere galdu gabe segitzen du eta Baztanek arrakastarekin bukatu zuen Kopako lehen neurketa

Lesakako Beti Gazteko Ohorezko Erregional mailako emakume eta gizonezkoek denboraldiko lehen garaipenak eskuratu dituzte asteburu honetan. Emakumeak Mutrikun egon ziren eta Ondarbeltz Amaikak Mutriku taldeari 1-3ko markagailuarekin irabazi zioten. Aurkariaren jokoari kontra egin ahal izan zioten eta orain arteko partidurik onena jokatu zutela adierazi du Ainara Otxoteko bigarren entrenatzaileak. Horrez gain, pasa den denboraldian lesionatu zen Idoia Garde jokalaria zelaira atera zen. 10-15 minutuz jokatu zuela kontatu du Otxotekok eta hori ere berri pozgarria izan zela.

Beti Gazteko Ohorezko Erregional mailako gizonezkoek ere garaipena eskuratu zuten pasa den ortzirale ilunabarrean Mastegin. Etxean jaso zuten Deusto FC taldea eta 4-0eko markagailuarekin irabazi zuten lesakarrek. Lau porroten ondotik, lehen hiru puntuak poltsikoratu zituzten Beti Gaztekoek eta Javier Escagües entrenatzaileak onartu duenez, honekin beharrezkoa zuten motibazioa lortu dute jokalariek, hemendik aitzinera dituzten partidu guztietarako indarra edukitzeko. Tartean, asteburu honetan bertan, Eibar B liderraren kontra jokatuko duten partidu gogorrerako.

Erregional mailako Gure Txokoak ere berri onekin bukatu zuen asteburua. Galdu gabe segitzen du Berako taldeak eta larunbatean, bertze hiru puntu eskuratu zituen Matzadan. Dunboa Eguzkiri 2-1 irabazi zioten eta denboraldi hasiera ezin hobea izaten ari direla azpimarratu du Ganix Zubieta entrenatzaileak.

Baztanek hasiera ona izan du Kopako txapelketan

Nafarroako Ligan bi asteko atsedenaldia dute, zenbait talde Kopa jokatzen ari direlako. Kasu hori da Lehen maila autonomikoan ari den Baztan taldearena. Pasa den larunbatean Kopako lehen neurketa jokatu zuten baztandarrek etxean, eta bertan jaso zuten bi maila beherago dagoen Asdefor. Itxuraz etxekoen aldeko neurketa izaten ahal zena, gogorragoa bilakatu zen azkenean. Irabazten hasi ziren baztandarrak, baina azken minutuetara bina berdinduta ailegatu ziren bi taldeak. Azken jokaldian gola sartu zuten Iban Romoren mutilek eta horrela, garaipena eskuratu zuten. Ortzegun honetan, urriaren 12an, Kopako bigarren partidua jokatuko du taldeak, Etxarri Aranatzen kontra eta euren etxean (12:30). Baztanek irabaziko balu, sailkapeneko liderra izanen lirateke eta beraz, hurrengo faserako txartela ere irabaziko luke.