Irungo taldeak euskal derbia bereganatu zuen atzo Artalekun, Anaitasunari 36-24ko markagailuarekin irabazita

Bidasoak eta Anaitasunak elkarren aurkako derbia jokatu zuten atzo Artalekun. 1688 zaleren aitzinean, etxeko taldeak ikuskizun ederra eman zuen eta Iruñeako taldea gainditzea lortu zuen, partidan guztian zehar markagailua bere alde edukita eta neurketa bukaerarako 36-24koa erdietsita.

Norgehiagokaren lehen gola Irungo taldeko Asier Nietok sartu zuen, bigarren minutuan, eta orduz geroztik, aurretik jarri zen Bidasoa neurketa bukaerara arte. Lehen minutuetan bi taldeak parekatuak egon baziren ere, etxekoek lortutako 4-0 partzialarekin, markagailua 9-4ra jarri zuten hamaikagarren minuturako eta errenta hori handitzen joan ziren atsedenaldira 17-10ekoarekin iritsi arte.

Azken zatian joko beretsua kantxaratu zuen Bidasoak, berritasun batekin. Azken asteetan geldirik egon den Victor Rodriguez jokora bueltatu zen atzo eta Artalekuk emozioz beterik jaso zuen jokalaria. Talde irundarrak markagailuan abantaila handiagoa lortu zuen azken 30 minutu hauetan, 13 goleko aldea eskuratzeraino (34-21, 55. minutuan). Hala ere, Anaitasunak errenta hori gutxitzea lortu zuen bukaerarako, eta azkenean, 36-24koarekin amaitu zen neurketa.

Bigarren garaipena jarraian erdietsi ondotik, Bidasoak EHF European Leagueko bigarren jardunaldia jokatu du datorren asteartean (azaroak 1), Füsche Berlinen kontra. Neurketa Berlinen jokatuko da, gaueko 20:45ean.

(Argazkia: Arrate Morales)