Aitor Zulaikak Bilbao Athleticek proposatu dezakeen “joan-etorriko neurketa” ekidin nahi du Real Unionek bolada bikainean jarrai dezan.

Sailkapenaren erdi-erdian kokatuta dagoelarik, Real Unionek Bilbao Athleticen aurka jokatuko du asteburu honetan, beti zaila izaten den Lezamako instalakuntzetan. “1.Federazio mailan baino gorago behar luketen” jokalariak eta “merezitako baino puntu gutxiago” batu dituen taldea da Aitor Zulaikarentzat bilbotarra.

Azken bi neurketak garaitu eta sei puntu batu eta gero, bolada bikainean da talde txuri-beltza, baina teknikari azpeitiarraren arabera, “emaitzak emaitza, taldeak ezin du aldartea aldatu”. Aldartea aldatu ez, baina azken bi asteak lasaiagoak igaro ditu Real Unionek, hirunaka batzea beti da onuragarria. Eta zergatik ez, aurrean izango duen taldeak planteatuko dizkion arazoak jakitun, segidan erdietsitako hirugarren garaipena Real Unionek.

Arazo gehienak jokalarien kalitate eta abiadurarengatik iritsiko dira. “Calahorrako jokoarekin antzekotasunak ditu Bilbao Athletic, jokalarien perfila da aldatzen dena. Kalitate handiko jokalariak dituzte, askok gorako mailaten aritzekoak eta zerbait badute abiadura da. Zaldiak dira, joan etorriko neurketak gustuko dituzte”, ohartarazi du Zulaikak.

Horren aurka zer egin galdetuta, teknikari azpeitiarrak erantzun paradoxiko bezain sinplea eman du: “Real Unionek garaipena eskuratzeko Bilbao Athleticek baino gehiago korrika egin beharko du”. Korrika egin eta baloia izan, baloiaren jabetzaren bidez lortuko baititu abaguneak sortzea.

Zelai-erdia hustuta. 

Carlos Bravori astelehenean sorbaldan ebakuntza egingo dioten bitartean, zelai-erdiko jokalarien hiru laurdena min hartuta ditu Zulaikak. “Anatz Elizondo eta Jagoba Behobide ez dira berreskuratu, Albert Vivancos azken unera arte zalantza izango da, baita Nacho Sanchez ere”, gehitu du azpeitiarrak. Badirudi hirugarrenez jarraian Ekhi Senarrek eta Quique Riverok zuzenduko dutela Real Union zelai erdian.

Lesionatu ugari ditu Real Unionek, askotxo, eta erdi ernegatuta “taldea astero lau edo bost min hartutako jokalarirekin entrenatzera ohitzen ari dela” aipatu du Zulaikak. Hori bai, hori ere “denon lanarekin gaindatuko dutelaren” konfiantza osoa du.

Autobus bat beteta, bigarrena bidean. 

Euskal Herrian norgehiagoka gutxi jokatuko ditu sasoi honetan talde txuri-beltzak; horregatik, Real Unionen zaleak Lezaman taldea hauspotuko dute. Azken jardunaldietako emaitzak lagunduta, klubak eskainitako autobus zerbitzuari erantzun bikaina eman diote: bat bete dute eta bigarrena bidean da. Kamiseta eta bufanda txuri-beltza soinean 50 bat zale inguru bertaratuko dira bihar Lezamara, horiek ere hirugarren garaipenaren bila.

Aitor Zulaikak ilusio handiz hartu du albistea eta sen txuri-beltza bueltatzen ari dela aurreikusi du: “autobus bat bete dela esaten ari naizen une honetan, ileak harrotzen ari zaizkit. Futbol profesionalean horrelako ekintzak goraipatzen badituzte, zer esan futbol erdi-profesional honetan. Hego harmailan eta tribunan sortzen ari den giroa zoragarria da eta oso lagungarria zaigu”.