Georgiako aurrelaria Alavesetik utzita etorriko da Irungo taldera datorren denboraldian

Real Unionetik jakinarazi dutenez, klub txuribeltza eta Giorgi Gagua akordio batera iritsi dira, eta honen ondorioz, jokalari georgiarrak Irunen jokatuko du datorren denboraldian. Gagua Alavesetik utzita arituko da Aitor Zulaikaren taldearekin.

Gio izenez ezaguna den aurrelaria Alaves B taldean aritu zen aurreko denboraldian, guztira 33 partida jokatuz, 1.700 minutu baino gehiago. Gainera, 15, 17, 19 eta 21 urtez azpiko Georgiako selekzioarekin parte hartu du Gaguak. Georgiarrak Real Unionera etortzeak pizten dion ilusioa adierazi nahi izan du: “Gogoz iristen naiz proiektu honetara. Ilusio handia dut entrenatzen hasteko eta taldeari ahal dudan guztia emateko”.