Txirrindulari irundarrak 23 urtez azpiko mailan lehiatu den lehendabiziko urtearen errepasoa egin du

Haimar Etxeberriak Valentziako Itzulian txapeldunorde izatea lortu du aurten. Lau egunez bere indargunea den erregulartasuna erakutsi eta sailkapen orokorreko bigarren postu horretan bukatu zuen itzulia. Gainera, 23 urtez azpiko mailan aritzen den lehendabiziko urte honetan zehar, emaitza onak lortu ditu eta etorkizun polita ireki zaio irundarrari. Oraindik hainbat alderdi fisiko hobetu behar dituela onartu du eta horretarako, lanean jarraitzearen garrantzia azpimarratu nahi izan du, hori izan baita aurten bereganatu duen irakaspenik baliotsuena: “Txirrindularitzan, bizitzan bezala, ez baduzu lank egiten emaitzak ez dira inoiz iritsiko”. Etxeberriak denboraldia itxiko du gaur Oñatiko lasterketarekin, eta honen ondoren, hilabete batez atseden hartuko duela adierazi du. Orduan, urtean zehar egin ezin duen guztia egiteko aprobetxatuko du.