Arrate Eibar 31-39 menderatu ostean, Il Capo Hondarribiak sailkapeneko hirugarren postuan bukatu du aurtengo denboraldia

Il Capo Hondarribiak, asteburu honetan, garaipen batekin eman dio amaiera aurtengo denboraldiari. Oraindik porrotarik jaso ez zuen Arrate Eibarren kontra jokatu zuen pasa den larunbatean eta 31-39ko markagailuarekin irabazi ondoren, hirugarren postuan sailkatu da Lehen Maila Nazionalera itzuli den urte honetan.

Lehen zati nahiko parekatua jokatu zuten bi taldeek ere, eta azken erdian erabaki zen neurketa. Hondarribitarrek 21era berdinduta zeudenean, Eneko Furundarenaren bi golekin, Tao Gey-Emparanen beste bi golekin eta Gorka Nietoren gol batekin, partidua beraien aldera eraman zuten eta lau goleko aldea ireki zuten markagailuan (22-26). Hortik aurrera, Il Capok eraman zuen norgehiagokaren kontrola eta hutsunea gehiago zabaltzea ere lortu zuten, zortzira iritsi arte. Horrela, 31-39ko markagailuarekin, garaipena eskuratu eta eibartarren lehen porrota ahalbidetu zuten.

Denboraldia amaitutzat emanda, Il Capo Hondarribiak hirugarren postuan amaitu du aurtengo denboraldia. Bost urte Lehen Maila Nazionaletik kanpo egon ondoren, itzulera honetan, 45 puntu eskuratu ditu guztira Helvetia Anaitasunaren (49) eta Eibar Eskubaloiaren (56) atzetik soilik.