Bidasoak aste baten buruan hiru neurketa jokatuko ditu; Guadalajararen garaitu ostean, Balonmano Logroño La Riojaren, sailkapeneko aurkari zuzenaren, kantxan arituko da bihar.

Guadalajaran maila ona eman zuen Bidasoak, baina asko kosta zitzaioan partiduko erritmoan sartzea; hain zuzen ere, Jacobo Cuetarak aitortu du, jokalari askok aldaketa eskatu zutela jokatzen ari ziren bitartean. “Jokalari batzuk, horrenbeste denbora lehiatu gabe egon ondoren, neurketaren erdian gaizki sentitu ziren eta aldaketa ere eskatu zidaten”, gehitu du Bidasoaren entrenatzaileak. Hala ere, arazo guzti horien gainetik, neurketa sendo bat jokatu zutela uste du Cuetarak.

Logroñoren aurkako neurketa zaila izango da, zuzeneko arerioa eta Europako lehiaketak jokatzeko txartela eskuratu dezakeen faboritoetakoa da. Konfinamenduak pasa dituen taldea da eta pixkanaka, behetik gora egiten ari dena. Lehen aldiz denboraldian, faboritoaren zama kenduko dutela adierazi du Cuetarak, “orain arte, neurketa guztietan, gu faboritoak izan gara eta presio gehigarria izan dugu gure bizkarrean; Logroñoren aurka, ordea, etxeko taldeak izango du zama hori”. Bidasoak sekulako aukera du sailkapenean gora egiteko, sailkapeneko goiko postuetan egoteko talde bat dela demostratzeko eta arerio zuzenekin abantailak handitzeko.

Etxetik kanpo jokatzen dituzten neurketek balio bikoitza dutela uste du Bidasoaren entrenatzaileak: “Azken urteetan irabazi ez dugun kantxetan, garaipenak erdietsi ditugu aurten, eta bide horretik jarraitu behar dugu bihar Logroñori irabazi nahi badiogu”. Hala ere, Cuetarak ohartarazi du, “bost neurketetatik bost garaipen lortu ditugu, baina ezin dugu pentsatu egunero garaipena lor dezakegunik, biharko neurketan Logroñok gauzak oso zail jarriko dizkigu”.

Taldea fisikoki hobetuz doa 

Zortzi egunetan hiru neurketari aurre egingo dio talde irundarrak; hala eta guztiz ere, entrenatzaile asturiarrak uste du, konfinamendu osteko bigarren neurketa honek, taldeari lehiaketako erritmoa berreskuratzeko balioko diola. “Zortzi egunetan hiru neurketa jokatzeak desgastatu baino, ondo etorriko zaigu itxialdiaren ondoren galdutako erritmoa berriz lortzeko”, adierazi du.

Guadalajaran jokalariak asko aldatzeko eta errotazioak egiteko parada izan zuen, beraz, taldea nahiko deskantsatuta iritsiko da Logroñora. Horretaz gain, min hartutako jokalariei dagokionez, jokalari guztiak prest izango ditu denboraldiko seigarren garaipena lortu eta Irunera bi puntu berrirerkin bueltatzeko.