Iera Agirre-Maite Ruiz de Larramendi eta Olatz Arrizabalaga-Naroa Agirre bikoteek aurrera egin zuten Irungo Uranzu frontoian jokatutako final-erdietan.

Asteburuan, Irungo Uranzu pilotalekuan, Laboral Kutxa Masterraren finala jokatuko duten bikoteak ezagutu genituen: Iera Agirre-Maite Ruiz de Larramendi eta Olatz Arrizabalaga-Naroa Agirre. Biek ala biek, nagusitasun handiarekin, jokatu zituzten final-erdietak mendean hartu zituzten. Lehenek, 22-12 irabazi zioten Olatz Ruiz de Larramendi-Naroa Elizalde bikoteari eta, bigarrenek, 22-8 garaitu zituzten Leire Garai-Oihana Orbegozo. Finala, final-erdiak jokatu ziren pilotaleku berean jokatuko da, Irungo Uranzun.

Lehen final-erdia ezusteko batekin hasi zen, normalean aurrelari bezala jokatzen duen Olatz Ruiz de Larramendik atzelari gisa jokatu zuen. Irantzu Etxebeste ordezkatzen zuen Naroa Elizalde espero genuen lehen koadroetan, baina arerioak ezustean harrapatzeko asmoz, postuak elkartrukatu zituzten. Hala ere, gutxirako balio izan zitzaien estrategiak; izan ere, Iera Agirrek eta Maite Ruiz de Larramendik osatzen duten bikoteak ez zieten neurketa bereganatzeko aukera bakar bat ere eman. Hasieratik, bizitasuna ezarri nahi izan zioten Olatz Ruiz de Larramendik eta Naroa Elizaldek, baina 6-1eko aldearekin erantzun zioten Iera Agirrek eta Maite Ruiz de Larramendik. Lehen jokaldietan lortutako abantaila ondo kudeatu zuten neurketan zehar eta 22-12ko emaitzarekin bukatu zen lehen final-erdia.

Bigarren final-erdiak, ostera, hasiera eta bukaera oso bestelakoa izan zuen. Hasiera borrokatu izan zen, bana, bina eta hiruna berdindu zuten Olatz Arrizabalaga-Naroa Agirre eta Leire Garai-Oihana Orbegozo bikoteak. Hortik aurrera, lehen bikoteak martxa hartu eta neurketan guztiz nagusitu ziren. Maila handiko tantoak egin zituzten eta zortzi puntutan utzi zituzten Garai-Orbegozo bikotea.