Amorebieta eta Real Unionen arteko partida ikustera autobusean joan ahal izanen dira zaleak

Real Unionek igande honetan, urtarrilaren 29an, jokatuko du SD Amorebietaren kontra Urritxe zelaian. Partidua 18:00etan izanen da eta bertara joateko autobusa antolatu du klub txuribeltzak, Autocares Unitravel enpresaren laguntzarekin.

 Urritxen arituko dira David Movillaren mutilak datorren igandean. Real Union Klubak jakinarazi duenez, zale guztiek aukera izanen dute bertara autobusean hurbiltzeko. Izan ere, Autocares Unitravel enpresaren laguntzarekin, klub txuribeltzak autobusa paratuko du Amorebietara joateko. Hitzordua 15:15ean eginen dute Stadium Galen eta prezioa, sarrera eta bidaia barne, 20 eurokoa izanen da 16 urtetik gorakoentzat eta 10 eurokoa 4 eta 15 urte bitartekoentzat.

Autobusean joateko izena eman beharko da aitzinetik. Horretarako, Stadium Galeko bulegoetara hurbildu beharko dira zaleak osteguna baino lehen, 10:00etatik 13:30era edo 17:00etatik 19:30era. Izena ematerakoen ordainketa egin beharko dela ere jakinarazi dute.

Euren autoetan joango diren zaleek ere sarreren prezioan beherapena izanen dutela argitu dute klubetik. Hain zuzen ere, 15 euro ordaindu beharko dute 16 urtetik gorakoek eta 5 euro 4 eta 15 urte bitartekoek. Sarrera hauek SD Amorebieta eta Real Unionen artean adostu dira eta Urritxeko lehiatilan eskuratu ahal izanen dira.