Talde txuribeltzak urrezko hiru puntu gehitu zituen atzo sailkapenera, Zamoraren aurka 0-1 irabazi ondoren

Real Unionek atzo jokatu zuen denboraldiko 31. jardunaldia Zamoraren aurka, Zamorako Ruta de la Plata zelaian. Nahiz eta etxeko taldeak irundarrek baino joko hobea erakutsi zuen, bigarren zatian Gexan Elosegik gola sartu eta garaipena talde txuribeltzarentzat izan zen.

Lehen zatia hasi eta berehala, Zamoraren nagusitasuna ikusi zen zelaian. Etxeko taldeak lau aukera garbi izan zituen gola sartzeko, baina ezin izan zituen errematatu. Lehendabiziko abagunea zortzigarren minutuan iritsi zen, Jordanek area kanpotik egindako jaurtiketa baten bidez. Bederatzigarren minutuan aldiz, Dani Hernandezek bota zuen baloia sarera, baina Irazustak gelditu zuen. Assan ere saiatu zen buruz gola sartzen, baina langa jo zuen. 18. minutuan, azkenik, Yanisek izan zuen aurretik jartzeko aukera baina hau ere ez zen sartu.

Atsedenalditik bueltan aldiz, Real Unionek aukera ongi aprobetxatu eta gola sartzea lortu zuen. Partiduaren 59. minutuan, Gexan Elosegik errematatu zuen Nuñezen jokaldi bat eta 0-1ekoa ezarri zuen hernaniarrak. Hortik aurrera, Real Unionen lana markagailua bere hortan mantentzea izan zen eta taldeak arrakasta izan zuen. Izan ere, etxekoak saiatu ziren berdinketa lortzen, baina ezin izan zuten hori eskuratu. Irundarrek gainera, bigarren gola sartzeko aukera ere izan zuten, baina Pau Torresek kornerrera bidali zuen baloia.

Azkenean, nahiz eta Zamoraren jokoak garaipena merezi, Real Unionek eraman zituen Ruta de la Plata zelaitik urrezko hiru puntuak. Horrela, talde txuribeltzak 47 puntu gehitu ditu guztira sailkapenean eta zortzigarren postuan kokatuta ekingo dio hurrengo asteburuko jardunaldiari. Stadium Galen arituko da Real Union larunbatean, Bilbao Athletic taldearen aurka, arratsaldeko 19etan.

(Argazkia: Zamora CF)