(Argazkia: Gio Batista)

Garaipen handia erdietsi du Real Unionek La Planilla futbol zelaian, birritan aurreratu den Calahaorra 2-4 mendean hartu du eta 12 punturekin kokatu da sailkapenean.

Eromena da lehen zatia hobekien deskribatzen duen hitza. Hastapeneko minutuetan, bi taldeak areara arriskuarekin iritsi dira, Real Union birritan eta erasokorrago. Txuri-beltzek gola hurbil izan dute, baina Calahorra izan da lehena baloia sarera bidaltzen. Errealeko harrobian hezitutako Jorge Martinez Losak lehen aukeran gola egin du. Honen burukadak ‘Txusta’-k gelditu du, baina bizkor ibili da aldaratzean Calahorra aurretik jartzeko (1-1, 11’). Real Unionen erantzuna azkarra izan da, Capeletek Calahorraren defentsaren aldaratze txarra baliatu du 1-1 ezartzeko markagailuan (13’).

Berdinketarekin batera neurketa berria hasiko zela zirudien, baina abiada berdinean jarraitu du. Calahorrak izan duen bigarren aukeran, Vicentek Martinez Losak buruz utzitako baloia ez du alferrik galdu eta 2-1 aurreratu du berriz etxeko taldea (17’). Madrazok hirugarren gola egiteko abagunea izan du; jaurtiketa, aldiz, Real Unionen atearen alboko sarera joan da. 4 minutu besterik ez dira igaro talde txuri-beltzaren goletik. Aitor Zulaikaren taldeari zegokion jokoa jartzea eta egin du. Pixkanaka metroak jan dizkio Calahorrari eta geldikako baloi batetik 2-2 (35’) berdinketa iritsi da . Arazoak izan ditu Calahorraren aireko jokoa gelditzeko, baina paradoxikoa bada ere, Alain Oiartzunen erdiraketa gozoa Carlos Bravoren buruan erori da eta zuzenean atea ikusi du.

Lehen zatian sufritzen jakin duen bitartean, bigarren zatian neurketa beregantu du. Merezi izan du garaipena, Calahorra baino gehiago izan da talde irundarra eta bigarren zatiko azken minutetan merezitakoaren saria jaso du. Hainbat aukeren ostean, Capeletek sakonean baloia bidali dio pasa den urteko goleatzaile nagusia izan zen Sergio Llamasi eta gasteiztarrak lehen aldiz aurretik jarri du Real Union (2-3, 84’). Nuerketa itxi edota kudeatu behar zuen Aitor Zulaikaren taldeak eta lehena egitea erabaki du. 88.minutuan Mikel Pradera areako jokalariek sartu behar duten gola egin eta norgehiagoka erabakita utzi du. Garaipen handia sailkapenean 12 puntu lortu eta aurrera egiteko, baita talde bezala hazteko.