Errugbi taldeak lehen aldiz erakutsi du euskaraldiarekin konpromezua eta arigune moduan lan egin du bi astez

Txingudi Rugby Klubak lehen aldiz parte hartu du aurten Euskaraldian arigune moduan. Euskararekin duen konpromezua erakutsi nahi izan du taldeak horrela eta Plaiaundiko kantinarekin batera, arigune bilakatu da. Iñigo Aizpurua elkartearen eskolako zuzendariak aipatu duenez, “urteak daramagu gure kideen artean euskararen sustapen aktiboa egiten, baina horrelako ekintza batera atxikitzea falta zitzaigun”.

Larunbat honetan, Euskararen Egunarekin, Plaiaundin elkarteko 16 urtez azpiko taldea arituko da Getxoren kontra eta Aizpuruk arigunea publikora irekitzeko aukera izanen dela azpimarratu du: “Gure 16 urtez azpiko taldeak Getxoren aurka jokatu behar zuen partidua larunbat honetara aurreratu da, hortaz, Euskaraldiaren azken egunean gure bigarren arigunea publikora irekia izango dugu”. Norgehiagoka goizeko 11:00etan jokatuko da eta taldeak denboraldiko lehen garaipena eskuratzeko aprobetxatuko du hitzordua.

Elkarteko eskolako taldea eta Gipuzkoako selekzioko tokapetak

Zaisa Txingudiko senior taldeak atsedenaldia izanen du asteburu honetan, eta gaztetxoek hartuko dute honen lekukoa. 16 urtez azpiko taldearen neurketaz gain, eskolako taldeak ere partida jokatuko du Arrasate, La Unica eta Iruña taldeen aurka. Jardunaldia Arrasaten ospatuko da, Mojategiko zelaian, goizeko 10:30ean.

Azkenik, Gipuzkoako selekzioko gazteen topaketak ere ospatuko dira asteburuan. Hain zuzen ere, larunbat honetan, Gipuzkoako 14 eta 13 urtez azpiko Gipuzkoako neska-mutilen selekzioak entrenatzen izanen dira Eibarren eta Ordizian. Neskak Eibarko Unbe zelaian bilduko dira larunbatean, 11:00etatik aitzinera. Mutilak berriz, Ordizian izanen dira 10:00etan.