Udalak zestapuntaren aldeko apostu sendoa egin du, pandemia garaian ere. Udan ez bezala, datozen asteetan gozatu ahal izango dugu Jostaldi pilotalekuan munduko puntistarik onenetaz. Hondarribia Grand Slam antolatu dute Jai Alive enpresarekin batera. Eta Txomin Sagarzazu alkateak eta Kiroletako ordezkaria den Kalixa Silanesek esan digutenez, uda honetan Markinan, Donibane Lohitzunen eta Miarritzen egin duten bezala, Hondarribian ere, behar protokoloekin baina aurrera egitea erabaki dute.

Irailaren 18 hontatik hasita, bost ostiraletan jarraian jokatuko dira ligaxka eta kanporaketak. Horietatik 4 partida ETBk emango ditu. Jostaldin, berez, 714 lagun sartzen direlarik, 302 eserlekutara mugatu dute aforoa. Eta protokoloen arabera, metro eta erdiko ditantzia gorde beharko dute ikusleek, maskarila jarrita eduki eta sarrera Jostaldiko goiko aldetik egingo den bitartean, alboko atetik atera beharko da.

Eta esan bezala, Grand Slam bat izanik, munduko puntistarik onenak bilduko dira Hondarribian. Bigarren jardunaldian, adibidez, irailaren 25ekoan gaur egun mundu mailan ikus daitekeen partidarik handienetakoa izango da, GOIKOETXEA-IRASTORZA eta BEASKOETXEA-LOPEZ.