Real Unionek DUX Internacional Madrid taldearen aurka jokatuko du igandean 17etan

Real Unionek denboraldi honetan kanpoan jokatuko duen azken partidua ospatuko du igandean, arratsaldeko 17etan. 35. jardunaldi honetan, DUX Internacional Madrid taldearen aurka aritu beharko da, Villaviciosa de Odonen. Nahiz eta aurkaria multzoko talderik onenetakoa izan, Aitor Zulaikak aipatu duen moduan, txuribeltzak “oso bizirik” daude oraindik.

Gaur goizean, partidu honen atarian Aitor Zulaikak egin duen prentsaurrekoan jakinarazi duenez, Real Unionek etxetik kanpo jokatuko duen azken neurketa izango da DUX taldearen kontrako hau. Hasiera batean, Extremaduraren aurkako norgehiagoka ere hitzartua zegoen, baina talde honen desagertzearen ondorioz, ez da jokatuko eta puntuak txuribeltzentzat izango dira. Horrela, hiru jardunaldi besterik ez zaizkie gelditzen irundarrei, eta horietako bakarra kanpoan, asteburu honetakoa alegia.

DUX taldearen inguruan ere mintzatu da entrenatzailea eta “teknikoki multzoko talderik onenetako bat” dela azpimarratu du. “Beraiek futbolaren inguruan duten idea garatzerako orduan, mentalki indartsuenetako bat da. Joku konbinatiboaren aldeko apustua egiten du”, gaineratu du azpeitiarrak. Aurkariak erakutsiko duen mailari aurre egiteko, Real Unionek “defentsiboki ideak oso garbi” eduki behar dituela esan du Zulaikak eta “baloiarekin guk ere min egin dezakegula erakutsi”. Villaviciosa de Odonen duten belar artifiziala ere aipatu du prestatzaileak, baina hau ez dela “jokatzeko aitzakirik” ere onartu du, “ikusi besterik ez dago nola jokatzen duten beraiek han”.

Astean zehar, partidu honi begira egindako prestaketak “ohikoak” izan direla jakinarazi du Aitor Zulaikak, nahiz eta aurreko asteko garaipenak “bizirik” egoten lagundu dien: “Garaipenaren ondoren, eta azken lau partiduetatik bi irabazi eta bat berdindu ostean, oso bizirik gaude. Helburu zail bat jarri genuen, baina hortik hurbil gaude eta lor dezakegula sinesten dugu. Hor zentratuta gaude erabat”.

Helburua play-off jokatzeko aukera ematen duten sailkapeneko postu horietan sartzea da, eta horretarako azken partiduak arrakastarekin gainditu beharko dituzte. Hala ere, Zulaikak adierazi duen moduan, taldea gogotsu dago eta hori lortzeko lanean jarraituko du buru-belarri.