Real Unionek Ligari jarraipena emanen dio igande honetan Real Murciaren kontra jokatuko duen neurketarekin

Real Unionek Errege Kopa jokatzeko helburua bete du dagoeneko, baina oraindik Ligan borrokan jarraitu beharko du, eta lehiaketa honetan bizirik mantentzeko hurrengo pausua igandean emanen du talde txuribeltzak. Hain zuzen ere, Murtziara bidaiatuko du taldeak Real Murciaren kontra neurtzeko, igandean arratsaldeko 17:00etan.

Aitor Zulaikak aurreratu duenez, “atzotik igandera bitartean zentzu guztiak ligan” jarriak ditu Real Unionek. Pasa den asteazkenean Terrassaren aurka lortutako garaipenarekin gogoz beterik dago taldea, eta ilusio hori mantentzeko Real Murciaren aurkako partidan beraien mailarik onena eman beharko dute txuribeltzek. Entrenatzaileak aipatu duen moduan, “urte honetan izanen dugun eszenatokirik politenetako batean” jokatuko dute igande honetan. La Condomina zelaira, “aurkari historiko” honek jende asko erakartzen du partiduro, “masa sozial” handia duen taldea baita, Zulaikaren hitzetan.

Real Murciak, gainera, “jokalari ezagun asko ditu, Lehen Mailan aritutakoak”, hala nola “Pedro Leon, Miku, Aguza eta Ganet” ekarri ditu gogora azpeitiarrak. Irundarrek motibatuta edukitzeko ezer gehiago ez dutela behar ere azpimarratu du prestatzaileak. Azken hauen lana, gaur eta bihar, entrenatzea izanen dela ere gaineratu du, “partidua ahalik eta xehetasun gehienekin prestatzeko. Partidu ederra izanen da, zaila eta borrokatua”.

Talde txuribeltzaren inguruan, “asteazkenekoak eta aurreko igandekoak taldeari gauzak eman” dizkiola onartu du Zulaikak, “ez bakarrik sailkatze bat eta hiru puntu, beste gauza batzuk ere eta horri jarraipena eman behar diogu igandean”, gaineratu du. Horretarako entrenamenduak ikusi nahi dituela ere jakinarazi du eta horren arabera jakinen duela taldea zer moduz dagoen.

Izan ere, azken orduetan baja gehiagoren berri eman du klubak. Alain Oyarzunek, hain zuzen ere, Amorebietaren kontrako neurketan min hartu eta bajan segitu beharko du. Zaintiratu akromio-klabikularra diagnostikatu diote eta ebakuntzarik eginen ez dioten arren, geldirik egon beharko da lesioa hobetu bitartean. Ezbehar hauek “egunetik egunera” gerta daitezkeela aipatu du entrenatzaileak eta “desdramatizatu” nahiko lituzkeela, “egoera hauek hobetzeko eta talde bezala eta indibidualki prestatzeko aukera bat” ere izan daitezkeelako.