Atzoko estropadan garaile izan baziren ere, larunbateko denborak kontuan hartuta, Urdaibaiek eraman zuen Zarauzko Bandera

Asteburu honetan Zarauzko XLV. Bandera jokatu zen bi jardunalditan. Larunbatean Urdaibaiek egin zuen denborarik onena eta atzo berriz, Hondarribiak. Hala ere, bi eguneko denborak batuta, Urdaibaiek lortu zuen azken garaipena, Zarauzko Bandera bereganatuz eta sailkapenean bere lidergotza sendotuz.

Hondarribiako traineruaren lana bikaina izan zen asteburuan Zarautzen. Larunbatean bigarren sailkatu zen, 20:43,24ko denborarekin, Urdaibaien atzetik (20:39,88). Atzo berriz, hirugarren luze azkar bat egin zuen eta aurretik jarri zen beste traineruekin tartea irekiz. Indarra erakutsita, Hondarribiako Ama Guadalupekoak atzoko jardunaldia irabaztea lortu zuten, estropada 20:10,62ko denboran osatuz. Hala ere, Udaibaiek ez zuen bandera hain erraz utziko eta beraiek ere indarrari eutsiz bigarren amaitu zuten, Hondarribiatik 00,02 segundura soilik. Beraz, bi eguneko denborak kontuan hartuta, Urdaibaiek eraman zuen XLV. Zarauzko Bandera.

Datorren asteburuan, Galiziara bidaiatu beharko dute Hondarribitarrek, Ares eta Boirora hain zuzen ere, bertan jokatuko baitira abuztuko azken bi banderak.