Aurten 10 neurketa jokatu dituen erdilari oreretarrak Aitor Zulaikaren planetan errepikatuko du, Errealak utzita arituko da Irunen.

Aurtengo denboraldian behar bezain beste jokatu ez duen arren, Aitor Zulaikaren gustoko erdilaria da Anatz Elizondo. Aurreko urtearen antzera, Errealak utzita arituko da talde txuri-beltzean. Errealean jokatu aurretik, Elizondo Real Unioneko harrobitik igaro zen, ondo ezagutzen ditu Stadium Galeko zelaiak eta barruan darama talde txuri-beltzaren DNA.

Aitor Zulaikak zuzentzen duen taldearekin 10 izan dira aurten jokatu ahal izan dituen neurketak. Denboraldi hasieran min hartu zuen eta denbora luzez min hartuta egon ostean, denboraldiko azken norgehiagoketan hamaikakoetako parte izan zen. Aitor Zulaikak Elizondo erabili zezakeen abagune bakoitzean Elizondo hasierako hamaikakoan kokatzen zuela nabarmendu beharra dago. Orotara, sasoiko lehenn fasean 7 neurketa jokatu zituen; bigarrenean, berriz, 3 besterik ez.

21 urte ditu Elizondok eta Errealeko maila eta talde guztietatik igaro da. Horrez gain, 16 urtez azpiko Euskal Herriko eta Espainiako selekzioekin aritutakoa ere bada.

Anatz Elizondoren lagapen berri honekin, gaur egun, Real Unionek bederatzi jokalari ditu kontratupean: Anatz Elizondo, Mario Capelete, Gorka Kijera, Jon Irazustabarrena, Patrick Sequeira, Ekhi Bravo, Ivan Perez, Gexan Elosegi eta Alain Oyarzun.