Bidasoak bihar BM Huesca jaso beharko du etxean, denboraldiko 14. jardunaldia berreskuratzeko asmoarekin

Bidasoak bihar arratsaldean jokatuko du neurketa berri bat Artalekun. Oraingo honetan Sacyr Asobal Ligako jardunaldia izango da, BM Huesca taldearen aurka. Norgehiagoka hau, abenduaren 5ean ospatu beharreko partida zen, baina orduan bertan behera gelditu zen Covid kasuak zirela eta. Beraz, jardunaldi hau berreskuratzeko asmoarekin, Aragoikoak Irunen egongo dira bihar 20:15ean.

Jacobo Cuetarak partida honen aurreko prentsaurrekoan aipatu duenez, “gure egutegia kolapsatzen ari da, eta nekea nabaria da. Hala ere, taldea maila ona erakusten ari da. Jokalari gazteek kalitatezko txandakatzeak baimentzen dizkigute eta beraien jokoarekin taldearen maila oso altu mantentzen ari dira”. BM Huescaren inguruan galdetuta, biak baldintza berdinetan ekingo diotela partiduari onartu du Cuetarak. Hala ere, aurkariak kantxan eragiten duen deserosotasuna kontuan hartu behar dela ere azpimarratu du: “Kasu honetan baldintza berdinetan gaude Huescarekin, izan ere, Cangasen aurka Errege Kopako neurketa jokatu du, amaiera zaila izan duena gainera. Hala ere, aurkari zaila da eta deserosoa. Ikusiko dugu ea etxean bi puntu ateratzeko aukera dugun”.

Kauldi Odriozolak ere partidu honetan lan ona egitea oso garrantzitsua izango dela aitortu zuen atzo: “Garrantzitsuena Liga da. Azkenean hemen lortu behar dugu emaitza ona hurrengo urteetan Europa jokatzeko. Aurreko egunean Cangasen aurka puntu bat lortu genuen. Orain deskantsatu behar dugu eta ostegunean berriz ere gogor atera bi puntu irabaztera, ea lortzen dugun sailkapeneko goiko aldean jarraitzea”.

Jon Azkue eta Rodrigo Salinas deialditik kanpo

Bidasoa Irun Klubetik jakinarazi dutenez, hilabete honetako azken partida hauetan ez dute Jon Azkue eta Rodrigo Salinas jokalarien laguntzarik izango. Izan ere, hauek biak sufritzen dituzten lesioak direla eta, deialditik kanpo egon beharko dute denbora batez. Jon Azkuek, alde batetik, eskuin eskuko hatz lodiko artikulazio interfalangikoan haustura bat zuen eta honek tendoi luzagarriari eragiten zionez, ebakuntza egin behar izan zioten astelehen arratsaldean. Oraindik ez dakite noiz arte egon beharko duten bajaz, bere bilakaeraren arabera erabakiko baitute.

Rodrigo Salinasek, beste aldetik, ezkerreko belaunean alterazio meniskala duela aipatu dute Bidasoatik, eta hurrengo astean proba gehigarriak egingo dizkiotela, behin betiko diagnostikoa eta tratamendua zein izango den zehazteko.

(Argazkia: Eduardo Agreda)