Jacobo Cuetararen taldea etxean ariko da berriz ere, eskenatoki berean Barçaren kontra emandako ikuskizunaren ondotik

Bidasoak denboraldiko hirugarren jardunaldia jokatuko du ortzirale honetan, irailaren 22an, bigarrena Artalekun. Barçaren kontra egin zuen partidu ikusgarri horren ondotik, etxean bueltan izanen da taldea bertze bi puntu poltsikoratzeko asmoz, eta sailkapenean, seitik bortz puntu eskuratzeko. Aurkari gogorra izanen du aitzinean, hala ere. Atletico Recoletas Valladolid etorriko da Irunera, momentuz neurketarik galdu ez duen taldea.

Emaitza onak pilatu ditu Bidasoak orain arte. Lau puntutik hiru eskuratu ditu eta bost ere izan nahi ditu ortzirale honen ondotik. Valladolid izanen du aitzinean, Artalekun, 20:00etatik aitzinera. Jacobo Cuetarak erran duen moduan, “neurketa interesgarria izanen da, oso lehiatua eta zaila”. Bi jardunalditik biak irabazi ditu aurkariak eta sailkapeneko bigarren postuan dago. “Momentu onean dago taldea, erraz irabazi dute eta forma bikainean daude”, gaineratu du entrenatzaileak.

Valladolidek “estilo bereizgarria” duela ere jakinarazi du Cuetarak: “Entrenatzaile desberdinak izan ditu eta joko aldatzen joan da, baina estilo bereizgarria du taldeak. Indibidualki ongi aritzen dira, jokalari desorekatzaileak ditu eta defentsan ere gogorrak dira. Guzti honekin ongi hasi dute Liga”.

Edonola ere, Bidasoa “aurkari zaila” dela ere onartu du prestatzaileak, “are gehiago etxean” daudenean eta “zaleen babesarekin”. Oraindik ere “sendotasuna” falta zaiela azpimarratu du Cuetarak, baina hala ere “bilakaera” izaten ari direla argitu du eta denboraldia “ongi” hasi dutela. Horregatik guztiagatik, eurek ere “aurkari zaila direla” azaldu du.

Eskuin hegalean arazoak izanen ditu Bidasoak bihar, entrenamendu baten faltan eta medikuaren ebazpenaren esperoan, Iñaki Cavero eta Tao Gey-Emparan biak minduta baitaude gaur. Arazoak konponduta, maila ona erakustera aterako dira bihar etxeko zelaira, ahalik eta puntu gehien batzeko asmoarekin.

(Argazkia: Arrate Morales)