Talde irundarrak 28-36ko markagailuarekin garaitu du Tolosa Euskal Kopako finalerdian

Bidasoak 28-36ko markagailuarekin garaitu du Tolosa, gaur Usabalen jokatu den Euskal Kopako finalerdian. Talde irundarrak harrobiko Joshua Omojola eta Xabier Landa atezainekin eta lehen lerroko Unax Berges eta Bingen Beraiz gasteiztarrarekin jokatu du goizean, lehen taldeko hainbat jokalari euren selekzioarekin bilduta daudelako.

Lehen zatian etxeko taldea agintzen hasi da, baina Dariel Garciak bostgarren minutuan sartutako golari esker, Bidasoak markagailua bere alde jarri du neurketaren bukaerara arte. Poliki-poliki aldea handitzen joan da talde irundarra, atsedenaldira bost goleko errentarekin ailegatu den arte (13-18).

Bigarren zatian, bidasotarrek beraien jokoa ezarri eta indarrez aritu dira Tolosaren kontra. Markagailuko aldea 12 golekoa ere izan da momentu batean, nahiz eta etxeko taldeak hori zortzira murriztea lortu duen partidaren amaierarako. Horrela, 28-36koarekin bukatu dute gaurko jardunaldia eta beraz, Bidasoak irabazi du Euskal Kopako finala jokatzeko txartela, Romo eta Trapaga taldeen arteko finalerdiko irabazlearen kontra jokatuko duena.