Bidasotarren artean bi igerilarik lortu dute irabaztea parte hartu duten lau probetan, Eider Emazabelek eta Oihan Cabanesek

Bidasoa XXI-eko igerilariek 36 garaipen lortu dituzte udako lehen hitzorduan. Probintzia arteakoa ospatu zen pasa den asteburuan eta bertan, bidasotarrek nagusitasun osoa erakutsi zuten. Egin ziren proben erdietan Irungo klubeko igerilari bat izan zen irabazlea. Sailkapen orokorrean, ia lau aldiz biderkatu zion bigarren klubari puntuazioan.

Bidasotarren artean bi kirolarik lortu zuten parte hartu zuten lau probetan irabaztea, Eider Emazabelek (200L, 100M, 100B eta 200X) eta Oihan Cabanesek (100E, 400X, 100L eta 400L). Honez gain, bertze bortzek hiru probetan izan ziren garaileak: Maria Yarzabal (100B, 200B eta 400X), Nora Valles (100M, 200M eta 200X), Garazi Azkue (100X, 200E eta 200B), Ekiñe Cabanes (800L, 100L eta 400L) eta Enai Galzacorta (100L, 200L eta 400L). Eider Garcia de Cortazarrek (100E eta 200E) eta Ekain Franciscok (1500L eta 200M) ere bina garaipen eskuratu zituzten. Azkenik, lehen postuan sailkatu ziren ere garaipen bakarrarekin Xarma Beraiz (100E), Pablo Cerro (200M), Ibai Cabrerizo (100B) eta Lucca Creo (200B). Hau guztiaz gain, erreleboetan ere seitik bortz garaipen eskuratu zuen Bidasoa XXI-ek, soilik gizonezkoen 4x100X erreleboak ez zuen irabazi, euren proba baliogabetu zutelako.

Estatuko minimo batzuk ere lortu zituzten bidasotarrek: Ekiñe Cabanasek (100L), Ekain Franciscok (1500L), Enai Galzacortak (100L eta 200L) eta gizonezkoen 4x100L eta 4x100X erreleboetan, baita emakumeen 4x100X erreleboan eta mistoen 4x100X erreleboan ere. Honez gain, gizonezkoen 4x200L erreleboak euren mailako klubeko errekorra lortu zuten.