Kadagua Eskubaloiaren 35. urteurrena ospatzeko, Bidasoak Anaitasunaren kontra lagunartekoa jokatu zuen eta garaipenarekin itzuli zen etxera

Bidasoak Helvetia Anaitasunaren kontra jokatu zuen larunbatean urteko lehen lagunartekoa. Zallan aritu ziren bi taldeak elkarren kontra, Kadagua Eskubaloiaren 35. urteurrena ospatzeko, eta Irungo taldeak 35-33ko markagailurekin eskuratu zuen bertan garaipena.

Neurketa oso parekatua jokatu zuten bi taldeek pasa den larunbateko lagunartekoan. Jacobo Cuetarak hamaika jokalari zituen kantxan, lehen taldeko lau internazionalak kanpoan baitzeuden eta bigarren taldea ere ligako partida jokatzen ari baitzen. Horrela, Ander Garcia jubenila izan zen Bidasoako atezaina eta beraz, lehen taldearekin debuta egin zuen.

Bidasoa aurretik egon zen lehen zati guztian zehar, baina azken minutuetan eta bigarren zatian ere, Anaitasunak nagusitasuna erakutsi zuen eta lau goleko errenta eskuratu zuen (18-22, 35. minutuan). Hala ere, Jacobo Cuetararen mutilek berdinketa eskuratu zuten 50. minutuan (28-28) eta azken momentuetan, aitzinetik jartzea ere lortu zuten, behin-betiko 35-33ko markagailua ezarriz.

Irungo taldeak urtarrilaren azken asteburuan jokatuko ditu azken lagunartekoak. Tolosan arituko dira urtarrilaren 27 eta 28a, bertako klubaren mendeurrena eta eskubaloi sailaren 50. urteurrena ospatzeko antolatu duten txapelketan. Bidasoaz gain, Civitas BM Guadalajara, BM Logroño La Rioja eta Billere taldeek ere hartuko dute parte.