Jacobo Cuetararen taldeak 21-29ko markagailuarekin irabazi zuen Santanderren Blendio Sinfin-en kontra

Bidasoak, Granollersen kontra galdu ondotik, berriz ere garaipena eskuratu zuen atzo arratsaldean Santanderren, Blendio Sinfin taldearen kontra. Neurketa berdindu batean, tartea irekitzeko gai izan ziren Jacobo Cuetararen jokalariak eta azken minutuetan, zortzi goleko aldea eskuratu zuten, 21-29 emaitza lortuta eta bi puntuak poltsikoratuta.

Lehen zati berdindu bat jokatu zuten Sinfin eta Bidasoak. Beti aitzinetik joan zen talde bisitaria, baina kantabriarrek hurbiltik segitu zieten. Irundarrek lortutako errentarik handiena lau golekoa izan zen, 25. minutuan (9-13). Hala ere, atsedenaldira bidean, tarte hori murriztu zuten etxekoek eta gol bakarrera jarri ziren lehen ordu erdia pasatuta, 13-14ko emaitza lortuta.

Bigarren zatia ere bide beretik hasi zen. Nahiko parekatuak egon ziren bi taldeak eta 15era berdintzea ere lortu zuen Sinfinek (35. minutuan). Edonola ere, minutuak pasatu ahala, bidasotarrek indarra hartzen joan ziren eta etxekoek aldiz nekea nabaritzen hasi ziren. Hau guztia aprobetxatuta, Cuetararen taldea markagailuan zuloa egiten hasi zen eta zortzigarren goleko aldea lortu zuen minutu guttietan, 21-29ko behin-betiko emaitza eskuratuta.

Defentsa lan ona izan zen azken momentuko gakoa, baita jokalari gazteek hartu zuten ardura ere. Furundarena, Rodrigo Salinak eta Matheus da Silvaren bajak kontuan hartuta, gazte mailako jokalariak izan ziren protagonista eta ongi hartu zuten euren ardura ere. Asier Iribar izan zen tartean, baita Javier Gastaminza ere. Azken honek debuta egin zuen lehen taldearekin atzoko partiduan eta bere lehen gola sartu zuen ere Sinfinen kontra.

Bi puntu gehiagorekin, bigarren postuan kokatuak daude bidasotarrak. Egoera horretan eginen diote aitzin heldu den ortziralean izanen duten partiduari. Etxean ariko dira berriz ere, Artalekun, eta bertan jasoko dute Ademar Leon taldea (20:00). Sarrerak dagoeneko salgai daude www.cdbidasoa.eus webgunean.

(Argazkia: DG Audiovisuales)