Irundarrek EHF Ligako Last 16 kanporaketa GOG Hånbol taldearen aurka jokatuko dute

Bidasoak, EHF European Leagueko hurrengo faserako txartela lortuta, orain final-laurdenetara sailkatzeko borrokatu beharko dute. Horretarako, Danimarkako GOG Håndbol taldearen aurka neurtu beharko dira Last 16 kanporaketan. Bi partida jokatuko dituzte elkarren aurka, joanekoa eta itzulikoa. Horietako lehendabizikoa Artalekun ospatuko da martxoaren 29an, eta bigarrena Danimarkan apirilaren 5ean.

Hilabete honen bukaeran jokatuko diren Last 16ko neurketak Multzo Fasearen sailkapena begiratuta osatu dira. Horrela, A Multzoko laugarren postuko taldeari, kasu honetan Bidasoari, B Multzoko txapeldunaren aurka aritzea egokitu zaio. Multzo bakoitzeko hirugarrenak beraz, kontrako taldeko bigarren sailkatuen aurka jokatuko dute, kantxa faktorerik gabe. C eta D Multzoen kasuan ere sistema bera erabili da.

Bidasoarentzat, 1987an Europako Txapelketan parte hartzen hasi zenetik, lehendabiziko aldia izango da Danimarkan jokatzen. Taldeak hiru aldiz jaso izan du etxean Virum Sorgenfri talde daniarra, baina ez zaio inoiz egokitu hara bidaiatzea. Aurrez aurre neurtu ziren lehendabiziko aldia 1997an izan zen, Europako Superkopako finalerdian. Orduan, Bidasoak 23-30 irabazi zion daniarrei, finalerako txartela eskuratuz. 2000. urtean ere elkarren aurka aritu ziren bi taldeak Irunen, EHF Kopako kanporaketan, eta hor ere irundarrek garaipen bikoitza eskuratu zuten, 32-34 eta 26-17ko markagailuekin.

(Argazkia: Arrate Morales)