Bidasotarrek 33-28ko markagailuarekin hartu zuten mendean Recoletas Atletico Valladolid taldea

Bidasoak denboraldi honetan etxean jokatu duen bigarren partida irabazi zuen atzo, Recoletas Atletico Valladolid taldearen aurka 33-28koa eskuratu ondotik. Gainera, talde irundarrak hirugarren garaipena jarraian lortu du honekin eta datorren astean Europako Txapelketa hasteko prest dagoela erakutsi du.

Etxeko taldea oso sendo atera zen kantxara atzo arratsaldean. Lehen minutuetan, Jon Azkueren, Iñaki Caveroren eta Rodrigo Salinasen golei esker, 4-0ekoa eskuratu zuen Bidasoak. Aurkariak orduan, hutsartea eskatu zuen, horri buelta emateko helburuarekin. Nahiz eta Valladolidek beraien markagailua estreinatu, talde irundarrak errenta mantentzea lortu zuen eta azkenik, 15-12koarekin iritsi zen atsedenaldira.

Bigarren zatian ere lehiakortasun bera erakutsi zuten Jacobo Cuetararen mutilek. Bi taldeen arteko aldea hiru eta lau goleko izan zen azken hogeita hamar minutuetan. Hala ere, neurketa bukatzeko hamar minutu gelditzen direnean, defentsan egindako lanari esker eta Kuba Skrzyniarzek atean egindakoari esker ere, tartea bost golera zabaldu zen eta Bidasoak 33-28ko markagailua erdietsi zuen partida bukatzerakoan.

Etxean beste bi puntu garrantzitsu eskuratuta, orain Bidasoak Europako Txapelketari ekin beharko dio. Zehazki, datorren asteartean jokatuko du talde irundarrak Norvegiako Kolstad Håndball taldearen kontra Artalekun, arratseko 20:45ean.

(Argazkia: Arrate Morales)