AZKEN ORDUKOA:

Bidasoa taldeak prentsa ohar baten bidez jakinarazi berri du gaur talde guztiari egindako koronabirus diagnosi froga batzuk emaitza positiboa eman dutela. Beraz, bihar Pfadi Winterthur taldearen aurka zuten neurketa bertan behera gelditu da, eta Bidasoak data aldatzeko eskaera egin du. Positibo eman duten guztiak ongi daudela eta ez dutela sintomarik aurkezten ohartarazi dute.

Azkenik, "osasun agintari eta kirol agintariekin harremanetan" daudela esan dute, "hartu beharreko beste edozein erabakiren aurrean".

Era berean, hurrengo larunbatean, azaroak 27an, Bidasoak Sacyr Asobal Ligaren barruan Recoletas Atletico taldearen aurka zuen hitzordua ere atzeratu egingo da. Aurrerago zehaztuko dute data berria. 

Pfadi Winterthur taldearen aurka neurtuko dira irundarrak bihar arratsaldeko 20:45ean

Bidasoak gaur arratsaldean bidaiatuko du Suitzara, bihar hitzordu garrantzitsua baitu Pfadi Winterthurren aurka. EHF Ligako laugarren jardunaldia izango da hau eta bigarren aldiz arituko dira bi taldeak norgehiagokan.

Orain dela hilabete bat Pfadi Winterthur taldeak Artaleku bisitatu zuen EHF Ligako bigarren jardunaldia jokatzeko. Bertan, Bidasoak suitzarrak mendean hartu zituen 32-28ko markagailuarekin. Oraingo honetan, irundarrei egokitu zaie besteen etxean aritzea eta nahiz eta gogoz dauden asteburuko garaipena eta gero, “partidu gogorra eta garrantzitsua” izango dela aurreikusi du gaur goizeko prentsaurrekoan Jacobo Cuetara entrenatzaileak. Izan ere, jardunaldi honetan irundarrek hurrengo faserako sailkapena izango dute jokoan.

Bidasoak aurrez aurre aurkituko duen etsaia, taldearen “bertsio ondu” bat izango dela aipatu du Cuetarak, izan ere, lesionatuta zeuden hainbat jokalari berreskuratu dituzte suitzarrak eta jokoan parte hartuko dute oraingoan. Hala ere, entrenatzaileak esan duen moduan, “gogoz gaude, emaitza oneko sasoian gaude eta garaipen asko lortu ditugu azken aldian”. Azkenik, arrakasta izateko taldeak egin behar duena azaldu du: “Gakoa ekintzetan eraginkortasuna izatea eta partidu ona egitea da”.