Irundarrek 33-26 menderatu zuten Benidorm Errege Kopako joaneko neurketan

Bidasoak atzo ekin zion denboraldiko bigarren itzuliari eta arrakastarekin amaitzea lortu zuten gainera. Errege Kopako joaneko neurketarekin eman zioten hasiera urteari eta, nahiz eta zalantzekin kantxaratu, irundarrek bere maila onena erakutsi zuten Artalekun, eta 33-26ko markagailuarekin irabazi zuten Benidormen aurka.

Lehendabiziko zatitik nagusitzen hasi zen Bidasoa eta aurretik jarri zen lehendabiziko minututik. Azken entrenamenduetan defentsa lana indartzen ibili zirela aipatua zuten irundarrek eta hori nabaria izan zen, batez ere Xoan Ledok egin zituen geldiketa ikusgarriekin. Horrek lagundu egin zien etxekoei markagailuan aldea irekitzen eta hortik aurrera, hori mantentzea izan zen beraien lana. Benidormek, partiduak ihesi egiten ziola ikustean, hutsartea eskatu zuen 16. minutuan eta hurrengo bi minutuetan indarrez aritu ziren golak sartzen eta Bidasoari baloiak lapurtzen. Kanpokoek aldea zertxobait murriztu bazuten ere (10-8), ez zen nahiko izan markagailua iraultzeko eta atsedenerako Cuetararen mutilek bost goleko aldea lortu zuten berriz ere (16-11).

Bigarren zatian Bidasoak bere indarrari eutsi zion eta, 46. minuturako, bederatzi goleko errenta eskuratua zuen (27-18, 15. minutuan, eta 28-19, 16. minutuan) . Benidormek, honen aurrean erantzun beharren zegoela ikusita, erasora jo zuen eta markagailuan hurbiltzea lortu zuen, aldea sei goletara murrizteraino. Gainera, azken minutuetan, bi taldeen arteko tartea bostera jeisteko aukera izan bazuten ere, Iker Serranok ez zuen asmatu baloia sarera sartzerakoan, eta Bidasoak azken aukera baliatu zuen. Izan ere, azken segunduan, Thomas Tesorierek gola sartu zuen eta errenta zazpi puntura eraman zuen, itzuliko neurketarako alde garrantzitsua lortuz (33-26).

Partiduaren ondoren, Jacobo Cuetara entrenatzailea pozik azaldu zen taldeak egindako lanarekin, baina oraindik hurrengo faserako txartela ez dutela guztiz lortu ere azpimarratu zuen: “Pausu garrantzitsua da. Bidasoaren bertsiorik onena erakutsi dute gaur jokalari guztiek, eta denboraldiko bigarren zatia hasteko modu ona da. Hala ere, itzulerako partiduan edozein gauza gerta liteke, eta neurketa zaila izango dela pentsatu behar dugu. Gure helburua gaur bezalako joko sendoa izatea da eta beraiek irabaz dezaketala ez sinestaraztea”.

Mikel Zabala jokalariak ere argitu zuen harro zegoela taldeak erakutsitako sendotasunarekin eta, nahiz eta zalantzekin hasi neurketa, hurrengo jardunaldiei aurre egiteko indarra lortu zutela esan zuen: “Egia esan taldea urtarrilean ondo aritu da, baina zalantzak bagenituen, Sinfinen aurkako lagunartekoa ez baitzen ondo atera. Hala ere, gaur taldeak oso serio jokatu du, hasieratik gainera. Oso garrantzitsua da kanporaketa hauetan aldea ateratzea eta hori lortu dugu. Gainera, garrantzitsua zen gaur irabaztea taldearen animoarentzat eta otsaileko partiduei aurre egiteko”.

Jacobo Cuetarak 200 partidu

Bidasoak ez zuen soilik garaipen bat lortu, izan ere, Jacobo Cuetarak atzo 200 partidu bete zituen taldeko entrenatzaile moduan. Berak aipatu zuen moduan, “garaipenarekin hau ospatzea oso garrantzitsua da. Hala ere, itzulerakoa partidua irabazi arte ezingo dugu guztiz ospatu, baina oso pozik nago taldeak gaur erakutsitako mailarekin”. 

(Argazkia: Arrate Morales)