EHF-ko Multzo Faseko seigarren jardunaldia jokatuko dute bidasotarrek Ipar-Mazedoniako taldearen kontra

Bidasoak Ipar-Mazedonian emanen dio bukaera urteari. Izan ere, 2022ko azken partidua bertan jokatuko du HC Eurofarm Pelister taldearen kontra. EHF-ko aurreko jardunaldian parez pare egon ziren bi talde hauek eta orduan Bidasoak hamabi golengatik irabazi zuen. Hala ere, emaitza bera errepikatzea zaila izanen dela diote eta partidu gogorra izanen dela.

Puente Geniletik zuzenean bidaiatu dute Bidasoako jokalariek Ipar-Mazedoniara. Bihar, abenduaren 13an, jokatuko dute bertako Pelister taldearen kontra, gaueko 20:45ean. Jacobo Cuetararen hitzetan, “partidu hau ez da aurreko astekoaren berdina izanen, eta ustezko horretan kokatu behar gara”. Entrenatzaileak aurreratu duenez, “sarrera guztiak agortu dituzte eta neurketa oso garrantzitsu bat izanen denaren irudia zabaldu dute”. Horregatik beragatik, “norgehiagoka Artalekun jokatu aitzinetik prestatu genuen moduan landu dugu”, jakinarazi du Cuetarak.

Biharko partidua “erabakigarria” izanen dela ere argitu du, izan ere, hurrengo faserako sailkatzea egonen da jokoan” eta “hirugarren postua lortzeko lehian jarraitzea”. Hau dela eta, Bidasoa “ilusioz” dagoela adierazi du prestatzaileak eta neurketari “lasaitasunean” eginen diotela aurre, irabazteko gai direla sinetsita.

Garaipena eskuratzeko gakoa zein izanen den ere azaldu du Cuetarak: “Aurreko asteko neurketaren alde positibo eta negatiboak kontuan hartu behar ditugu. Hala ere, ezin dugu partidu hau erreferentziatzat hartu, ez baitugu gauza bera aurkituko”.

Urteko azken jardunaldiari aurre egiteko prest dago talde irundarra, 2022 urteari dagokion denboraldi zatia modu positiboan borobiltzeko alegia. Zaila izanen dela kontuan hartuta, Bidasoako jokalariek beraien mailarik onena emanen dute Pelister taldearen kantxan, bihar gaueko 20:45ean. 

(Argazkia: Estefania Hernandez)