Gaurtik aitzinera, Real Uniongo abonatuek Mallorcaren aurkako neurketa ikusteko sarrera eskura dezakete

Real Unionek Mallorcaren aurkako Errege Kopako kanporaketa ikusteko sarrerak salgai jarriko ditu gaurtik aitzinera. Momentuz, klub txuribeltzeko bazkideek soilik eros ditzakete sarrerak, eta heldu den astean publiko orokorrarentzat irekiko da salmenta. Mallorcaren aurkako neurketa abenduaren 20an ospatuko da, iluntzeko 21:00etan.

Errege Kopako sarrerak gaurtik aitzinera jarriko dira salgai Real Unioneko bazkideentzat. Hauek lortzeko, abonatuak Stadium Galeko bulegoetara edo denda ofizialera gerturatu beharko dira jendaurreko ordutegian: astelehenetik larunbatera, 10:00etatik 13:30era eta 17:00etatik 19:30era. Abenduaren 6an eta 8an, jaieguna izanik, bulegoak itxita egonen dira. Klubak aurrez aurreko salmena aprobetxatuko du bazkideen datu-basea eguneratzeko.

Heldu den astelehenetik (abenduak 5) aitzinera berriz, RCD Mallorcako zaleek izanen dute partidurako sarrerak erosteko aukera. Hauek online egin beharko dute eta Real Unionek gune berezi bat prestatuko du beraientzat, Ekialdeko Tribunan. Sarrerak eskuratzeko esteka hauxe da: https://entradas.realunionclub.com/copa-del-rey.

Azkenik, bazkide ez diren guztiak abenduaren 9tik aurrera erosi ahal izanen dituzte sarrerak. Orduan, bazkideek erreserbatu ez dituzten eserlekuak salgai jarriko dira, bertze guztiekin batera. Publiko orokorrak internet bidez eros ditzake, baita bulegoetan edo dendan ere. Honez gain, abonatuek ere bigarren sarrera bat erosteko aukera izanen dute abenduaren 9tik aitzinera. Hauek bertatik bertara bildu beharko dute euren sarrera, bulegoetan edo dendan, eta abonatuen prezio berean eskuratu ahal izanen dute, nahiz eta ezin izanen zaien eserlekua bermatu.

Partidurako sarreren prezioak hauek izanen dira. Tribuna Nagusian, 14 urtetik aurrerako abonatu helduek 15 euro ordaindu beharko dute, 13 urte bitarteko abonatu haurrek 12 euro eta azkenik, abonatu ez direnek 35 euro. Ekialdeko Tribunan, bazkide helduek 12 euroen truke lortu ahal izanen dute sarrera, haurrek 10 eurotan eta bazkide ez direnek 25 eurotan. Azkenik, Preferentziako eserlekuetan abonatu helduek 10 euro ordaindu beharko dute, abonatu haurrek 5 euro, abonatuak ez diren helduak 20 euro eta abonatuak ez diren haurrak 10 euro. 

(Argazkia: Mikel Blasco)