REAL UNION: Txusta, Azkoiti, Aimar, Esnaola, Urkizu, Rodellar, Mikel Alonso (Martins, 58'), Mujika, Ozkoidi (Iriondo, 70'), Eizmendi, Galán (Barrón, 77').

RAYO MAJADAHONDA: Basilio, Rubén, Sergi (Vázquez, 46'), De Pedro, Iñaki, Oliva, Jorge Félix, Arranz, Acha (Lorente, 82'), Jose Luis, Blanco (Carco, 66').

GOLA: 1-0: Mikel Alonso (55').

EPAILEA: Carbajales Gómez. Txartel horiak: Txusta, Azkoiti, Iriondo (Real Union); Sergi, Blanco (Rayo Majadahonda).

Denboraldi honetan lau aldiz aritu dira elkarren aurka Real Union eta Rayo Majadahonda, baina azkenekora arte, txuribeltzek ez dute nagusitzea lortu. Ligako hogeita hirugarren jardunaldian izan da, Stadium Galen. Kostata irabazi dute, hori bai. Lehen zati ederra egin du Unionek. Jokoan fin ibili da, eta baloirik gabe, presio antolatua eta eraginkorra egin du. 20.minutuan izan du lehen gol aukera, kontraeraso batean. Ozkoidik eskuin aldera zabaldu du baloia, Galanek barrura egin du, ezkerrez jaurtitzeko. Baloiak zutoina jo du, barruko aldetik. Oso hurbil izan du gola Galanek berak, hamabi minutu beranduago. Bere jaurtiketa hankartean gelditu zaio atezainari. 36.ean, aurrelari nafarrak eta Eneko Eizmendik elkarri traba egin diote, gola eskura zutenean. Ahaleginak egin badituzte ere, txuribeltzek ez dute lehen zatian abantaila hartzea lortu.

Bigarrenaren hasieran iritsi da gola. Jokaldi landua borobildu du Mikel Alonsok, Ozkoidiren pasea jaso eta baloia bigarren zutoinera bidalita. Gola sartu bezain pronto Alonso zelaitik atera du Aitor Zulaika entrenatzaileak, Mikel Martinsen sarrerarekin zelai erdia indarberritu nahi izan du, Rayok egindako aldaketei aurre egiteko. Neurketaren kontrola galdu du, hala ere, Real Unionek, eta arriskua sortzeko modua topatu du arerioak. Gol aukera argirik ez du izan, dena den, txuribeltzen defentsako lan onari esker. Real Unionek abantaila izanagatik ere, nolabaiteko ezinegona nagusitu da Stadium Galen azken minutuetan. Luzapenean Rayoren azken bultzadari aurre egin behar izan dio Irungo taldeak. Baloia berreskuratu du, eta bigarren gola sartzeko kontraerasoa izan du. Barronek, baina, pase eskasa egin dio Eizmendiri, eta beasaindarrak huts egin du errematean. 1-0ekoa aski izan da, hala ere, Unionek hamalaugarren garaipena ospatzeko.