Arraun denboraldia hasteko hilabete baino gutxiago geratzen denean, Hondarribia Arraun Elkarteko gizonezkoen ontziak garaipena erdietsi du Lekeitioko uretan. Emakumezkoak, Orio eta Donostiarraren atzetik, hirugarrenak izan dira.

Hilabete baino gutxiago geratzen da arraun denboraldia has dadin. Prestaketa luzeen ostean eta udararekin batera, Hondarribia Arraun Elkarteko traineruak azken hilabeteak bikain baliatzen dituzte ahalik eta egoera onenean Eusko Label eta Euskotren Ligak ekiteko. Asteburu honetan, talde hondarribitarreko bi ontziak denbroaldia hasi aurreko azken test garrantzitsuan lehiatu ziren. Lekeitiko uretan, gizonezkoen traineruak garaipena erdietsi zuen; emakumezkoen ontzia, berriz, hirugarren postuan helmugeratu zen.

Hamaik traineruk parte hartu zuten Leikeitioko emakumezkoen Banderan, horietatik, Hondarribia eguneko hirugarren ontzi azkarrena izan zen. Azpiko itsasoak eta haizeak baldintzatutako estropadan, Oriok eta Donostiarrak soilik irabazi zioten traineru berdeari eta atzetik, Tolosaldea izan zuten aurkari zuzenena. Nagusitasun osoz, 11:38 denborarekin, proba Oriok bereganatu zuen, bederatzi segunduetara Donostiarra iritsi zen eta hauen atzetik, 14 segundura helmugeratu zen Hondarribia Arraun Elkartea. Donostiarra aurten Oriori Euskotren Ligako garaikurra kentzeko deituta dagoen taldea da; beraz, positibotzat jo daiteke traineru donostiarretik gertu ibiltzea. Tolosaldeari sei segunduko abantaila atera zion ‘Ama Guadalupekoa’ ontziak, Arraun Lagunak izan ziren bosgarrenak eta horiei jarraiki, Zumaiak, Ondarroak, San Juanek, Hibaikak, Deustuk eta Lekittarrak osatu zuten sailkapena.

Emkumezkoen lehiaren ostean, gizonezkoen ontzian uretaratu ziren, 15 partaideetatik ontzi azkarrena Hondarribia Arraun Elkartearena izan zen. Lau txandatan banatu zen estropada, ‘Ama Guadalupekoa’ trainerua azkenekoan aritu zen eta hirugarrenean Donostiarrak eginiko denbora hobetzea zen berdeen erronka. Zortea aldeko, laugarren txandan haizeak zerbait behera egin zuen eta egoera atseginagoa izan zuten beren onena emateko. Gauzak horrela, 21:25,08 gurutzatu zuten helmuga eta bandera bereganatu zuten. Hondarribia Arraun Elkarteko txanda berean aritu ziren Zierbenak eta Urdaibaik bukatu zuten bigarren eta hirugarren postuan, hondarribitarrekiko 5 eta 13 segunduetara, hurrenez hurren.

Laugarren txandan ere Orio neurtu zituen indarrak Hondarribia Arraun Elkartearekin, baina horiek ezin izan zuten laugarren postuan Donostiarrari aurrea hartu. ARC 1 mailan arraun egingo duen Getariak eguneko seigarren postua eskuratu zuen, Eusko Label Ligan arituko den Ondarroaren aurretik bukatu zuen estropada, baita bere ligan aurkari zuzenak izango dituen Arkote, Sanpedrotarra eta Kaikuren aurretik ere.

Etxeko traineruak, Isuntzak, eta Zarautz Arraun Elkarteak, biak Eusko Label Ligako taldeak, ez zuten jardunaldi ona izan; minutua baino gehiago galdu zuten biek eta hamaika eta hamabigarren postuan bukatu zuten estropada. Bi ontzi horien atzetik, Portugaletek, Deustuk eta Busturialdeak azken hiru postuak bete zituzten.