Bidasoa ez da EHF European Leagueko multzoko faseko zozketan izango. Neurketa gogor eta zail batean, RK Nexek bost goleko aldeaz kanporaketa menderatu du (29-25).

Gora behera handiko lehen zatia jokatu dute Nazic hirian RK Nexe eta Bidasoak. Irundarrek bikain ekin diote neurketari, 1-4ko partziala erdietsi dute Kauldi Odriozolaren hiru gol bizkor baliatuta eta 6.minutuan kroaziarren entrenatzaileak 1-5koarekin hutsartea eskatu behar izan du Bidasoaren erritmoa geldiarazteko.

Lehen hamar minutuetan RK Nexe oso deseroso aritu da eta Bidasoak bere horretan jarraitu du 10.minutura arte (2-7). Orduan iritsi da etxeko taldearen erreakzioa. Hobeto kokatu dira kantxan eta pixkanaka-pixkanaka Bidasoak zuen aldea murrizten joan dira. 5-7koarekin Jacobo Cuetarak hutsartea eskatu du, baina gutxirako balio izan du; izan ere, Radovanovic atezainak geldiketak egiten eta erasoko jokalariek golak sartzen hasi dira 10-8koa ezarri arte. 8-1eko partzial sendoa jaso du Bidasoak eta lehen aldiz neurketan, RK Nexe jarri da agintzen markagailuan.

 Beste behin, Jacobo Cuetarak neurketa geldiarazi behar izan du, baina talde irundarrak ezin izan du lehen zatiaren amaieran markagailuan aurretik jarri. Kroaziarrek erdietsitako bi golen aldea ondo kudeatu dute eta aldageletara 13-11 irabazten joan dira. Azpimarratzekoa Kauldi Odriozolak lehen 30 minutuetan egindako lana, Bidasoaren 11 goletatik 7 gauzatu ditu zumaiarrak.

Bigarren zatian, RK Nexe neurketa irabaztera eta Artalekuko errenta haustera irten da eta 5.minutuan bost goleko errenta izatera heldu da (17-12). Zailtzen joan da neurketa; izan ere, Donat Bartokek 2 minutuko zigorra jaso du eta Nexeren goraldiari jokalari bat gutxiagorekin aurre egin diote. Bidasoa ondo moldatu da erasoan bat gutxiagorekin, baina atzean kroaziarrek erraz zulatu dute Xoan Ledoren atea (21-16, 10.minutuan).

Baina, beti bezala, Bidasoa esnatu da eta RK Nexe jokalari bat gutxiago aritu den minutuak baliatu ditu norgehiagokan egonkortu eta markagailuan gerturatzeko. 0-3ko partziala erdietsi du talde irundarrak eta 21-19koa ezarri dute, berriro ere, Bidasoa kanporaketan agintzen jarri da. Une zailetan, Bidasoako eskarmentua duten jokalariak azaldu dira, Julen Aginagaldek bi gol sartu ditu eta Jose Manuel Sierrak geldiketa apartak gauzatu ditu. Bidasoa bost goleko galerakin ibiltzetik, azken hamar minutuetan norgehiagoka berdintzera pasa da.

Hortzak inoiz baino gehiago estutu behar izan ditu Bidasoak, azken hamar minutuak bihotzekoak jotzeko modukoak izan dira. Defentsan minuturik onenak jokatu du talde irundarrak, baina kroaziarrek golak egiten jarraitu dute. Bukatzeko bost minutu falta zirenean, markagailuak 25-23 adierazten zuen, momentuz, kanporaketa irundarren alde aurkitzen zen. Bihotzarekin eta zuen guztiarekin jokatu du Bidasoak azken minutuak, baina Radovanovic atezainak talde irundarraren aukera guztiak alderatu ditu. Partidua bukatzeko bi minuturen faltan, bi gol behar zituen Bidasoak EHF European League txapelketan jarraitzeko. Gol bat sartu dute, baina ezin izan dute Rodinen azken ezkerkada oztopatu eta RK Nexek 29-24 irabazi du.