Real Unionek igande honetan bisitatuko du Gimnàstic de Tarragona taldea, arratsaldeko 18:00etan

Real Unionek denboraldiko azken bortz partidak izanen ditu hemendik aitzinera, erronka moduan. Azken bortz finalak izanen dira, Iñaki Goikoetxeak aipatu duen moduan, eta puntuak batzen segitzeko asmoa dute, ahalik eta aukera gehiago edukitzeko maila mantentzeko. Horretarako hurrengo aukera beraz, igande honetan izanen du talde txuribeltzak (apirilaren 30ean), Gimnàstic de Tarragonaren kontra, arratsaldeko 18:00etan.

Iñaki Goikoetxeak pasa den asteburuko Bilbao Athletic B taldearen kontrako garaipenak “arnasa” eman diela aipatu du gaur goizeko prentsaurrekoan. “Behintzat burua pixkat atera eta konfiantza hartu dugu”, gaineratu du. Honek eman dien bultzadarekin beraz, “astean zehar jokalariak beste animo batekin entrenatu” dutela onartu du entrenatzaileak eta espero dutela igandean ere “emaitza horiek mantendu eta garaipena eskuratzeko” aukera edukitzea.

Hala ere, Nàstic taldearen kontrako partidua “gogorra” izanen dela aurreikusi du prestatzaileak: “Etxean, batez ere, oso taldea sendoa da. Joko zuzena dute, jende handia eta gogorra izanen da. Duelu askoko partida izanen da eta horietan ez gara ondo moldatzen”. Zailtasun horiek ikusita, “astean zehar horri buelta emateko lan egin” dutela azpimarratu du Goikoetxeak eta batez ere, “lan defentsiboari” begiratu diotela, nahiz eta “ezer berezirik” ere ez duten aldatu.

Talde txuribeltza, edonola ere, “animoso” dagoela jakinarazi du entrenatzaileak: “Jokalariekin egindako hizketaldietan animoso daudela ikusi dut eta hobeto. Entrenamendu onak izan dira eta oraindik ere final horietan puntuak ateratzeko aukera dugula ikusten dugu, baten bat atzean uzteko. Horri buelta ematen ari gara eta gustatzen zait nola dagoen taldea”.

Gogotsu eta ixaropentsu ekinen diote beraz, igande honetako partiduari Real Unioneko jokalari eta teknikariek. Oraindik ere maila mantentzeko aukera irekia dute eta horren bila joanen dira buru-belarri.