Bidasoa Irunek Puerto Sagunto taldea bisitatuko du larunbatean (abenduaren 9an) 18:00etan

Bidasoa Irunek Plenitude ASOBAL Ligako hamalaugarren jardunaldia jokatuko du Puerto Saguntoren kontra, etxetik kanpo. Larunbatean jokatuko dute partidua, abenduaren 9an, 18:00etan. Taldea “zentratuta eta motibatuta” ikusten du Jacobo Cuetara entrenatzaileak eta aukera ona ikusten du klubak puntuetan bere marka historikoa lortzeko.

Jacobo Cuetara entrenatzaileak “gogoz” dagoela erran du larunabteko neurketaren aitzinean. “Aukera handia dugu gauza aunitz lortzeko, klubak duen marka historikoa gainditzeko puntuak batuta, eta lehen itzulia sentsazio onekin bukatzeko”, gaineratu du. Horretarako, jokalariak “zentratuta eta motibatuta” ikusten ditu prestatzaileak.

Puerto Saguntoren kontra jokatuko du larunbatean Bidasoak eta deus ere galtzeko ez duen talde baten konta bere etxean jokatzea zaila izan daitekeela aipatu du Cuetarak: “Azken postuetatik ateratzeko borrokan dauden taldeak goiko postuetan daudenen kontra jokatzen dutenean hazten dira eta bere bertsiorik onena erakusten dute”.

Horren aitzinean, Bidasoak “eskenatokirik zailena” imajinatu behar duela aipatu du entrenatzaileak. Egun bat lehenago bidaiatuko du taldeak Puerto Saguntora eta bertan, entrenamendu saio bat eginen dute. “Kantxara egokitzeko” balio izanen die, kantxa guztiak baitira desberdinak eta entrenamendu horrek kokatzeko balio die jokalariei.

(Argazkia: Arrate Morales)