Espainiako Eskubaloi Erret Federazioaren zuzendaritzak ematen duen saria da hau eta ekainaren 10ean ospatuko den galan jasoko du aitortza Aginagaldek

Julen Aginagalde Akizu Bidasoa Irungo jokalariak Espainiako Eskubaloi Erret Federazioaren Urrezko eta Brillantezko intsignia eta domina jasoko ditu. Horrela adierazi du sari hau emanen dion RFEBMko zuzendaritza batzordeak. Heldu den ekainaren 10ean Madrilen ospatuko den 2023ko Sari Nazionalen galan eginen diote aitortza jokalariari.

Asteburu honetan eskubaloi profesionalean azken pausuak emanen dituen Julen Aginagalde Akizuk Espainiako Eskubaloi Federazioak ematen duen Urrezko eta Brillantezko intsignia eta dominak jasoko ditu bere ibilbideagatik. Bere aitzinetik eskubaloi jokalari handiek jaso dute sari berbera, hala nola, David Barrufetek, Alberto Entrerriosek, Enric Masipek edota Jose Javier Hombradosek.

Aginagalde 1999tik da jokalari profesionala, Bidasoarekin ASOBAL Ligan debuta egin zuenetik hain zuzen. Honez gain, 2006ko ekainean aritu zen lehen aldiz Espainiako selekzio absolutuarekin. Urte guzti hauetan, jokalariak 442 partidu jokatu ditu ASOBAL Ligan, horietatik 252 Bidasoarekin, eta guztira 1.078 gol sartu ditu.

Espainiako Selekzioarekin aldiz, 205 neurketa ofizial jokatu ditu eta 495 gol sartu. Kamiseta gorriarekin munduko txapeldun izan zen 2013an eta Europakoa 2018an eta 2020an. 2016an Europako txapeldunorde izan zen eta 2014an berriz, brontzezko domina irabazi zuen. Domina hau bera ere eskuratu zuen 2011ko Munduko Txapelketan. Bere ibilbidea borobiltzeko, 2021ean Tokion ospatu ziren Joku Olinpikoetan parte hartu zuen eta brontzezko bertze domina ere irabazi zuen.

Taldekako sariez gain, banaka ere zenbait aitortza egin dizkiote jokalari irundarrari. 2010, 2012 eta 2013ean ASOBAL Ligako jokalari onenaren saria eman zioten. Gainera, 2013an eta 2019an, Munduko Txapelketako eta VELUX EHF Champions Leagueko piboterik onena izendatu zuten. Aitortza bera egin zioten 2014ko eta 2016ko Europako Txapelketan, baita 2012an Londresen izan ziren Joku Olinpikoetan ere.

Julen Aginagalde Bidasoa Irungo kirol zuzendaria da gaur egun, bere lehen urrats profesionalak eman zituen klub berean. Hala ere, bertze talde batzuetatik ere pasatu da irundarra. Forkamuntza Il Capo Hondarribia taldean egin ondotik, Plenitude ASOBAL Ligako bertze hiru klub historikoetan ere aritu da pibotea: Ademar Leon, BM Ciudad Real eta Atletico de Madrid. Hauetan ez ezik, Poloniako KS Kielce taldetik ere pasatu da. Azken honetan zebilela, VELUX EHF Champions Leagueko txapeldun izan zen, 2015/16 denboraldian. Honez gain, Poloniako sei liga irabazi ditu eta bertze hainbertze kopa ere (2013/14, 2014/15, 2015/16, 2016/17, 2017/18 eta 2018/19).

ASOBAL Ligan ere zenbait garaipen ditu Aginagaldek. BM Ciudad Real taldearekin Liga bat (2009/10), ASOBAL Kopa bat (2010/11), Espainiako Superkopa bat (2010/11) eta Kluben Munduko Txapelketa bat (2009-2010) irabazi zituen. Ademar Leonekin berriz, ASOBAL Kopa bat (2008/09) eskuratu zuen. Azkenik, Atletico Madrid taldearekin bi Errege Kopa (2011/12 eta 2012/13), Espainiako Superkopa bat (2011/12) eta Kluben Munduko Txapelketa bat (2012) irabazi zituen.

(Argazkia: Haimar Marcos)