Gipuzkoako Txapelketetan aritzen diren Behe Bidasoako taldeek honako emaitza hauek erdietsi zituzten asteburu honetan. 

Emakumezkoen Ohorezko Erregional Mailako liderra eta azken sailkatua nor baino nor gehiago aritu ziren asteburu honetan. Mariñok 6-1 mendean hartu zuen Intxaurdi-Oiartzun txapelketako lehen jardunaldian eta Urnietak 5-1 galdu zuen Añorgaren aurka. Lehen jardunaldiko emaitza horiek ikusirik, zaila egiten zen Mariñoren porrota aurreikustea, baina futbolean gutxitan funtzionatzen du logikak. Urnietak 3-0 mendean hartu zuen talde irundarra, ez zen Maialen Elgorriagak zuzentzen duen taldearen egun onena izan. Emaitza honen bidez eta bi jardunldi jokatuta, hiru punturekin, Mariño sailkapeneko hirugarren postuan kokatuta dago.

Gizonezkoen Erregional mailan, Landetxa taldeak eskuratu zuen jardunaldiko garaipen bakarra; hain zuzen ere, Mariñoren aurkako Irungo derbian 2-0 Landetxa auzoko taldea nagusitu zen. Mariñok aurreko asteburuan Behobiaren aurka jokatu eta 2-1eko garaipena erdietsi zuen, baina jardunaldi honetan ezin izan zuen bigarren derbian lorpena errepikatu. Behobiak eta Dunboa Eguzkik porrot mingarria jasan zuten, biek ala biek emaitza berarekin. Behobiak, etxean, 1-4 galdu zuen Orereta Kafea taldearen aurka eta Dunboa Eguzkik 4-1eko emaitza jasan zuen Sanpedrotarraren zelaian. Sailkapenari dagokionez, Landetxa 4 punturekin eta laugarren postuan hobekien kokatutako talde irundarra da. Mariño seigarrena da hiru punturekin eta Dunboa Eguzkik eta Behobiak azken postuak betetzen dituzte, oraindik, punturik batu gabe.

Datorren asteburuan, Emakumezkoen Ohorezko Erregional mailan, Mariñok Añorga liderraren zelaia bisitatuko du. Añorgak, momentuz, jokatu diren bi jardunaldiak aise bereganatu ditu (5-1 Urnietaren aurka eta 0-6 Touringen aurrean). Gizonezkoen Erregional mailan, Behobiak Sanpedrotarraren zelaian jokatuko du, Landetxak Orereta Kafearen aurka jokatuko du etxetik kanpo eta Dunboa Eguzkik eta Mariñok, etxean, Trintxerperen eta Astigarraga Mundarroren aurka arituko dira, hurrenez hurren.