BIDASOA: Ledo, Vázquez (1), Nonó (3), Kauldi (7), Salinas (2), Popovic, Redondo. Zubiria, Cavero, Crowley, Aldaba, Serrano (2), Muiña, Renaud (5), Lancina (5).
BARCELONA: Ristovski, Sorhaindo (2), Ariño (3), N’Guessan, Mem (3), Palmarsson (3), Gómez. Pérez de Vargas, Victor Tomás (2), Entrerríos (3), Rivera (3), Spyrzak (8), Hernández (1), Morros (2), Lenne, Jallouz (4).
MARKAGAILUA: 2-1, 3-3, 5-7, 6-7, 6-10, 11-12 (atsedenaldia); 12-17, 14-21, 15-25, 18-27, 23-32, 25-34.

Munduko eskubaloi talde onenen multzoan dago F.C.Barcelona, eta txiki geratzen zaio Asobal Liga, gaur egun. Garai batean, Artaleku kantxa zaila zen talde kataluniarrarentzat. Orain aldiz, sasoi osoko garaipen segidako beste geltoki bat baino ez da. Ilusioz sartu zen Bidasoa asteazkeneko partidan, eta estu hartu zuen arerio erraldoia, lehen minutuetan. Horretarako, defentsan gogor aritzeaz gainera, Xoan Ledo atezainaren erakustaldia behar izan zuen etxeko taldeak.

Markagailuan aurretik ibili zen Bidasoa, 10.minutuan Yallouzek beso bortitzari askatasuna eman zion arte (3-4). Lan ona egiten jarraitu zuen Jacobo Cuetararen taldeak, nahiz eta erasoan, Barçaren harresia gainditzeko zailtasun handiak eduki. 11-12koarekin, atsedenaldiaren aurretik markagailua berdintzeko aukera eduki zuen Bidasoak, baina ez zuen erasoa ondo kudeatu.

Bigarren zatiaren hasieran, bi baloi galdu zituen Bidasoak segidan, eta Valero Riverak eta Victor Tomasek, bakoitzak alde batetik, ez zuten kontraerasoan barkatu. Barcelonak martxa bat gehiago sartu zuen orduan, eta ihes egin zuen. 37.minutuan hutsartea eskatu behar izan zuen Cuetarak. Baina ordurako, urrunegi zegoen aurkaria (12-19). Hortik aurrera, Barçak mendean eduki zuen Artalekuko taldea. Azken porroten ondoren, sailkapeneko egoera konplikatu dakioke Bidasoari. Hilaren 25ean, Zamora azken sailkatuaren etxean jokatuko du. Aurkari bat, behintzat, urrun samar uzteko aukera izan daiteke.