Bigarren taldeak bina berdinduta amaitu zuen igandean Añorgaren aurka jokatutako partiduan

Añorga KKE: Eraunzetamurgil; Andonegui (Azpirotz, 60. min.), Unanue, Amiano, Aramendi; Franco (Maiz, 77. min.), Yarza, Sevillano, Aranburu (Aiestaran, 60. min.), Uranga (Alfonso, 69. min.); Larrañaga (Eribe, 77. min.).

Real Union B: Iza; Ariztimuño, Gonzalez, Olaciregui; Fernández (Martinez de Liza, 70. min.); Rodriguez (Herrero, 85. min.), Rodrigo, Ollo, Delpuerto, Arzuaga (Cabo, 70. min.); Bravo (Artola, 89. min.).

Emaitza (2-2): 0-1, Bravo (2. min.); 1-1, Larrañaga (24. min.); 1-2, Arzuaga (60. min.); 2-2, Azpirotz (penaltiz, 89. min.).

Epailea: Julen Lasarte Gonzalez (Euskadi). Txartel horia atera zien Aramendiri (63. min.) eta Unanueri (68. min.) Añorga KKEren aldetik eta Gonzalezi (30. min.), Bravori (38. min.) eta Izari (66. min.) Real Union Bren aldetik. Asier Díez Real Union Bren delegatua kanporatu zuen txartel gorri zuzenarekin (69. min.). Carlos Garcia Real Union Bren entrenatzailea ere kanporatu zuen partida bukatu ondoren, lehenik txartel horia zuena (12. min.).

Bestelakorik: Ohorezko Erregional Mailako 30. jardunaldia. Rezola.

Real Union B taldeak, pasa den igandean, denboraldiko 30. jardunaldia jokatu zuen Rezola zelaian Añorgaren aurka. Txuribeltzak birritan aurretik egon baziren ere, azken minutuan, zalantza handiak sortu zituen penalti batek berdinketa ahalbidetu zion etxeko taldeari.

Carlos Garciak entrenatzen dituen mutilak indarrez atera ziren zelaira Añorgan, eta bigarren minutuan lehendabiziko gola sartzeko aukera aprobetxatu zuen Ekhi Bravok. Etxeko taldearen erantzuna 22 minutu beranduago etorri zen, Larrañagaren eskutik. Atsedenaldira beraz, bana berdinduta iritsi ziren bi taldeak. Bigarren zatia hasi eta 15 minutura, Arzuagak jarri zuen berriz ere bere taldea aurretik. Irundarrek 1-2ko markagailua mantentzen jakin zuten amaierara arte, baina azken minutuan eztabaidak sortu zituen jokaldiak berdinketa ahalbidetu zion berriz ere Añorgari. Epaileak zalantza handiko penalti bat adierazi zuen 89. minutuan eta Azpirotzek lortu zuen gola sartzea. 2-2ko emaitzarekin, Real Union B-k ezin izan zituen hiru puntuak Irunera ekarri.

Denboraldia bukatzeko lau jardunaldiren faltan, Real Union B sailkapeneko hamabostgarren postuan dago kokatuta, 30 punturekin guztira, eta horrela ekingo dio hurrengo asteburuko neurketari. Orduan, bigarren sailkatua den CD Elgoibar jaso beharko du etxean. Partidua larunbatean izango da, arratsaldeko 16etan.