Txuribeltzek bihar, ostiralarekin, jokatuko dute denboraldiko 29. jardunaldia Badajozen aurka

Real Unioneko jokalari eta teknikariak gaur abiatu dira Irundik Badajozera, izan ere, bihar arituko dira Nuevo Vivero zelaian Badajoz taldearen aurka. Denboraldiko 29. jardunaldia izango da hau eta gaueko 21etan jokatuko da.

Txuribeltzek aurrean beste talde gogor bat izango dute bihar eta berriz ere indarrez atera beharko dira zelaira. Badajoz irundarren atzetik doa, baina bi puntuko aldea dute soilik bi taldeek. Gainera, Extremadurako taldeak erakutsi du jada bere balioa. Hain zuzen ere, orain dela bi jardunaldi Deportivori menderatzea lortu zuen etxean, 3-0eko markagailuarekin. Horregatik, Real Unionek ahalik eta maila onena erakutsi beharko du kanpoan oraingoan ere.

Gaur goizeko prentsaurrekoan, Aitor Zulaika entrenatzaileak aipatu duen moduan, “bihar eguna luze samar egingo zaigu, baina honek ez nau arduratzen. Gure taldean pentsatzen ari gara, baita aurrean izango dugun taldean ere. Biok ze joku egingo dugun ikusi behar dugu eta nola ateri zuku gehiago joku horri”. Irundarrak lehengo asteko porrota ahantzi eta berriz ere ekin diote aste honetako lanari. Azpeitiarra pozik azaldu da jokalariek entrenamenduetan erakutsi dutenarekin: “Emaitzak aldekoak ez direnean normalean baino aurpegia haserretuagoak ikusten ditugu, baina taldeak lan ona egin du eta hori da garrantzitsuena. Oso gustora nago eta astea ondo joan da”.

Real Union Ligako bisitaririk onena da eta hori erakutsiko du beste behin bihar ere Badajozen aurka, Nuevo Vivero zelaian, bihar gaueko 21etan.