Talde txuribeltzak El Ferrol Racing bisitatuko du bihar denboraldiko 27. jardunaldia jokatzeko asmoz

Real Union gaur abiatu da El Ferrolera, bertako El Ferrol Racing taldearen aurka lehiatzeko. Denboraldiko 27. jardunaldia izango da hau eta, nahiz eta, beste neurketa zail bat izango duten irundarrek, aste honetan jokalariek egindako lan onari ordainsaria eman nahiko diote. Partidua bihar jokatuko da, La Malata zelaian, arratsaldeko 17etan.

Aitor Zulaika entrenatzaileak gogoratu duen moduan, azken zazpi egunetan irundarrek hiru partidu jokatu dituzte. Honek suposatu dien neketik berreskuratzeko, txuribeltzek bi egunez hartu zuten atseden, eta segidan ekin zioten berriz ere lanari, gaur hirugarren entrenamendua zutelarik. Nahiz eta baja batzuk dituzten, prestaketa hauek biharko neurketari begira egin dituzte eta Zulaikak aipatu duenez, “oso ondo prestatzen ari gara. Jendea lanean ari da eta ez dut ezer esateko. Lasai gaude eta pozik egunerokotasuna nola izaten ari den ikusita”.

El Ferrol taldearen inguruan ere aritu da azpeitiarra gaur goizeko prentsaurrekoan. Izan ere, momentu honetan aurkari zuzena dute sailkapenean: Real Union baino postu bat gorago dago, baina puntuetan berdinduta. Hala ere, prestatzaileak ez dio garrantzi gehiegirik eman datu hauei, ezta talde irundarra bisitari onena dela esaten duten estatistikei ere: “Etxetik kanpo ondo lehiatzen ari gara, baina lehenago egindakoak ez du ezertarako balio. Beste partidu zail bat dugu, El Ferrol oso talde ona da eta sei neurketa daramatza galdu gabe, baina ez gara zoratuko horrekin. Gu geu izatera joango gara, ondo prestatuta eta partidu lehiakor bat egitera”.

Gexan Elosegi jokalariak ere Zulaikaren hitzak azpimarratu ditu eta norgehiagoka honek taldea berriz ere indartzeko balio dezakeela ere gaineratu du: “Taldeak lan ona egin du, bajak baditugu, baina beste hainbat gaude eta neurketari aurre egingo diogu. Bidai luzea dugu, baina ez da aitzakia. Nik uste konfiantza berreskuratzeko partidu egokia izan daitekeela. Guk betiko lana egingo dugu eta, horren aurrean, ikusiko dugu ea emaitza ona ateratzeko aukera dugun”.