David Movillaren mutilek “guztiz optimizatuta” dagoen talde bati egin beharko diote aurre, Urritxe zelai berezian

Real Unionek euskal derbi txiki bat izanen du datorren igandean, urtarrilaren 29an, 18:00etatik aitzinera. Hain zuzen ere, Urritxe zelaian arituko dira txuribeltzak Amorebietaren kontra. Denboraldiko lehen itzulian, orduan Aitor Zulaikaren mutilak zirenak, 4-3 garaitu zuten Haritz Mujikaren taldea. Orain aldiz, zailago izanen dute, gora egin duen taldea izan baita eta Urritxeko zaleen bultzadarekin irabazi bertzerik ez dute izanen euren burutan.

David Movillari Urritxe zelaiaren egoeraz galdetu diote gaur goizeko prentsaurrekoan. Berezia bada ere, eta azken egunetako eguraldiak aldaketak sortu ahal izan baditu ere, “bi taldeentzat zelai bera” izanen dela adierazi du entrenatzaileak. Hain zuzen ere, “aitzakirik ez dela egonen”, gaineratu du eta “jokoaren baldintza bat izanen bada ere, ez da bertze asteetan kontuan hartzen ez dugun zerbait”.

Zelaiaren egoera baino gehiago, zaleen bultzadak kezkatzen du Movilla. Kezkatu baino, jakitun da eurek duten indarraz eta nolako presioa eragiten duten aurkariarengan”. Horretaz guztiaz gain, taldearen balioa ere kontuan hartu beharko du talde irundarrak. Denboraldia ez zuten hain ongi hasi, baina orain “guztiz optiminatuta” dagoen taldea da prestatzailearen hitzetan: “Talde ezinhobea da. Ofentsiboki baliabide asko ditu eta gainera, atezain erabakigarria dute”.

Edonola ere, Real Unionek “bere mailan dagoen Txusta” ere badu eta hori izanen da iganderako gakoetako bat, Movillaren erranetan. Honez gain, “talde moldakorra dela erakutsi beharko dugu. Proposatzen diguten jokoari egokitu beharko gara, baita zelaiari eta indibidualki erakusten duten ahalmenari ere”, onartu du entrenatzaileak.

Horretarako, etxean duten errendimendu bera erakutsi beharko dute igandean Urritxen ere. Zenbait baja ditu oraindik Real Unionek eta zalantza izanen dira Ivan Perez eta Aranburu ere, Movillak jakinarazi duenez. Hala ere, puntuak batzen saiatzerako aterako dira zelaira, 18:00etatik aitzinera.