Etxekoak aitzindu ziren markagailuan bigarren zati hasieran, baina aurkariak emaitza berdintzea lortu zuen

Real Unionek bana berdinduta bukatu zuen atzo arratsaldean Galen, Ponferradinaren kontrako partiduan. Bigarren zatiaren lehen jokaldian aitzindu zen Fran Justoren taldea, baina hamar minutu beranduago emaitza berdintzea lortu zuen aurkariak. Horrela, puntuak banatuta bukatu zen denboraldiko bederatzigarren jardunaldia.

Orain arteko lehen zatirik onena jokatu zuen Real Unionek Galen atzo. Hala ere, ezin izan zituen aukerak errematatu eta hutsean gelditu ziren bi taldeak 45 minutuak pasatuta. Hiru abagune garbi izan zituzten txuribeltzek. Lehena, Escobarrek hamahirugarren minutuan. Josecak erdiraketa egin zuen eta Escobarrek errematatu, baina goregi joan zitzaion baloia. Bost minutu beranduago, Josecak Alaineri pasatu zion baloira eta honek ez zuen atean asmatu. Azkenik, Alainek gol olinpiko bat sartzeko aukera izan zuen, 29. minutuan, baina langan jo zuen jaurtiketak.

Aldageletatik bueltan iritsi zen Real Unionen gola. Bigarren zatiaren lehen jokaldian sartu zuen Escobarrek 1-0ekoa. Hala ere gutti iraun zuen markagailuak horrela, izan ere, aurkariak partidua berdindu zuen 56. minutuan. Abelendak sartu zuen gola eta neurketa parekatu zuen honela. Txuribeltzak saiatu ziren bigarren gola sartzen eta partidua euren alde jartzen berriz ere, baina ezin izan zuten horrelakorik egin.

Puntu bat lortuta, Real Union sailkapeneko laugarren postuan kokatu da orain, 16 punturekin.

(Argazkia: Aimar Lasa)