Bi talde hauen arteko neurketa arratsaldeko 17:00etan ospatuko da

Real Unionek Calahorra jasoko du bihar etxean, Stadium Galen. Hitzordua arratsaldeko 17:00etan izanen dute eta David Movillak aitzindu duen moduan, talde irundarrak “bere hazte prozesua lehiaketara eramateko” momentua du bihar. Puntuak batzeko beharretan daude etxekoak eta horren bila aterako dira zelaira.

David Movillak aste honetan zehar, “inoiz baino hobe lanean aritu” direla aipatu du. Aurreko astean ere entrenamendu onak egin zituzten eta azken egun hauetan, “lan hori oraindik hobea izan da”. Real Unionek igarri du bere lehen taldea “hazten” ari dela eta orain, “hazte prozesu hori lehiaketara eramateko” momentua duela.

Calahorra izanen dute aitzinean txuribeltzek, “ongi lehiatzen den taldea eta, azken aldian, sendotu egin dena”, entrenatzileak onartu duenez. Bertze behin, neurketa gogor bat jokatuko da bihar Galen eta aurkariak Real Unionen lana “zailduko” duela argi du Movillak. Aragoiko taldeak entrenatzailea aldatu du berriki eta zazpi fitxaje egin ditu. Guzti honek “lehiakortasuna” eman diela azpimarratu du prestatzaile txuribeltzak .

“Futbolari onak” dituen talde bat ere badela erran du Movillak eta “baloia duenean eraginkorra dela”. Honez gain, “aurkariari gutxi ematen dion jokalariak ditu” eta, zentzu horretan, Real Unionek indarrez borrokatu beharko du bere jokoa inposatzeko eta neurketa bere alde jartzeko.