Salbazioa eskura dute txuribeltzek eta irabaztera aterako dira helburua behin-betiko finkatzeko

Real Unionek denboraldia etxean bukatuko du maiatzaren azken asteburuan, baina horren aitzinetik Castellon bisitatuko dute txuribeltzek bihar, maiatzaren 20an, 19:30ean. Salbazioa inoiz baino eskurago du Iñaki Goikoetxearen taldeak eta bertze garaipen batek hori mantentzera lagunduko lieke.

Iñaki Goikoetxeak adierazi duen bezala, taldea lasai dago: “Garaipenak konfiantza eman digu, baita lasaitasuna ere. Azken asteetan txukun ari gara lanean eta intentzio berarekin eta gogo berarekin gaude aste honetan ere”.

Castellon bisitatuko dute oraingoan txuribeltzek eta neurketa zaila izanen dela argi dute: “Oso zaila izanen da. Aurkaria etxean oso gogorra da. Play off-erako sailkatu dira dagoeneko, baina oraindik ere bigarren-hirugarren postu horren lehian daude. Gainera, zale asko joanen dira zelaira eta gogorra izanen da”.

Hala ere, Real Unionen idea “irabaztea izanen da eta libre egotea”, Goikoetxearen erranetan. “Oso konzentratuta egon behar gara”, gaineratu du. Izan ere, Castellonek dituen jokalariak “oso onak dira, mugimendu askokoak”. Baloi jabetza ere beraiena izaten omen da, etxean batez ere, entrenatzaileak adierazi duenez: “Etxean jokatzen dutenean, baloi jabetza beraiena izaten da. Badakigu dominatuak izanen garela minutu askotan eta hor sendoak izan beharko gara eta ongi defendatu. Gainera, ahalik eta denbora gehien eduki behar dugu guk jabetza, bestela gure porterian egonen gara eta horrek ez digu garaipenik emanen”.

Hau lortzeko, “ondo entrenatu” dutela ere jakinarazi du prestatzaileak eta jokalariak ere “gogotsu” daudela. Goikoetxeak aipatu du azken asteetan honen inguruan solasean aritu direla eta konziente direla “gutxi falta dela”, baina agian “zailena geratzen dela”. Gainera, kalean jendeak “egina dagoela” sentitzen du, baina horretarako oraindik ere irabazi behar dela adierazi du entrenatzaileak.