UD Logroñes-ek 87. minutuan sartu zuen gola eta horrela, jardunaldiko hiru puntuak eskuratu zituen

Real Unionek porrot mingarria jaso zuen atzo Las Gaunas zelaian, UD Logroñes taldearen kontrako partiduan. Txuribeltzek aukerak izan bazituzten ere, ezin izan zuten golik sartu. Aurkariak aldiz, neurketa bukatzeko hiru minutu gelditzen zirenean, baloia sarera sartu, eta garaipena eskuratu zuen, jardunaldiko puntuak bereganatuta.

Etxeko taldea saiatu zen lehenbizi markagailuan aitzina hartzen. Menudok egin zuen jaurtiketa, nahiz eta Irazustak ondo gelditu zuen baloia. 16. minutuan berriz, Nacho Sanchezek izan zuen aukera, baina bere saiakera gora joan zen. 40. minutuan, jokalari bera saiatu zen markagailua bereganatzen, baina jaurtiketa hau ere gurutzatuegia joan zitzaion. Horrela, atsedenaldira hutsean berdinduta iritsi ziren bi taldeak.

Bigarren zatia ere bide beretsutik joan zen. Lehen abagunea UD Logroñes-ena izan zen, baina hauek ez zuten atean asmatu. Bortz minutu beranduago, berriz ere saiatu ziren, baina orduan Irazustak kornerrera bidali zuen Doncelek egindako jaurtiketa. Hurrengo jokaldian berriz, Nacho Sanchezek izan zuen gola sartzeko aukera kontraeraso batean. Saiakera hau ere atezain aurkariak deuseztatu zuen. Bortz minutura, Sanchezek berriz ere, emaitza euren alde jartzeko saiakera egin zuen, baina atezainaren aitzinean zegoenean, epaileak falta adierazi zuen zelai erdian. Horrela, Real Union bere aukerarik gabe gelditu zen eta garaipena erraztu zion UD Logroñes-i. 87. minutuan, Rufok sartu zuen baloia sarera eta horrela, garaipena eskuratu zuten etxekoek.

Hiru puntuak galduta, Real Unioni zaildu egin zaio maila mantentzeko lana. Sailkapeneko 17. postuan kokatu da orain talde irundarra, 34 punturekin. Horrela, datorren asteburuan, larunbatean (apirilaren 22an) zehazki, Bilbao Athletic taldea jasoko du talde txuribeltzak Galen, 19:00etatik aitzinera.

(Argazkia: UD Logroñes)