Costak eta Zoilok lehen taldearekin lanean segituko dute eta Fernandezek, Pinedok eta Lopezek osatuko dute taldea

Gaur goizean izan dira Real Uniongo lehen taldeko teknikari berriak Stadium Gal bisitatzen. Aitzinetik zeuden Ricardo Costa eta Ibon Zoilorekin batera, Millan Fernandez, Erik Penedo eta Angel Lopez hasiko dira taldean lanean.

Fran Justo lehen taldeko entrenatzaile berriarekin batera, Millan Fernandez arituko da bigarren prestatzaile lanetan. CD Lugo, CD Arenteiro, Ourense CF eta SD Nogeuira taldeetan aritu da lanean, Justorekin batera.

Erik Penedok ere osatuko du teknikarien taldea. Prestatzaile fisikoa izanen da Penedo eta Coruxo FC, CD Choco, Ittihad Tanger eta RC Celtako harrobiko taldeekin lanean aritu da, Real Unionera ailegatu baino lehen. Analisi lanetan berriz, Angel Lopez arituko da. Lopez Nucia CF-tik etorriko da Irungo klubera eta esperientzia du Ourense CF klubean ere.

Aitzinetik Real Uniongo lehen taldea ongi ezagutzen duten bi teknikarik ere segituko dute lantaldean. Ibon Zoilo prestatzaile fisikoa izanen da baita ere, bere esperientzia zabala aprobetxatuz: Tolosa CF, SD Beasain, Al Khalej (Arabiar Emirerri Batuak), Deportivo Alaves, UD Salamanca, Portugalgo Atletico Clube eta Real Union.

Azkenik, Ricardo Costak atezainen entrenatzailea izaten segituko du. Costak 2007/08ko denboralditik dabil Real Unionen lanean eta ongi ezagutzen du kluba. Horren aitzinetik lan berbera egin du entrenatzaileak CD Trintxerpen eta SD Lengokoak taldeetan.