Emakumeek Ligako lehen partidu ofizial batean debuta eginen dute Zornotzan

Txingudi Rugby Klubak aurredenboraldia bukatu du eta orain Ligari hasiera emanen dio. Senior talde guztiek igande honetan jokatuko dute denboraldiko lehen jardunaldia. Berritasuna emakumeen taldean egonen da, izan ere, debuta eginen du mugakoen talde berriak partidu ofizial batean.

Zornotzan ariko da lehen aldiz Txingudiko emakumeen taldea. Ligako partidu ofizial bati aurre eginen diote lehen aldiz eta gogotsu hasiko dira lehen erronka honekin. Elorrio/Urgozo taldea izanen dute aitzinean, igandean 11:00etan, Larrea kiroldegian. Bizkaitarrek bigarren urtea dute Liga jokatzen eta pasa den urtean, debuta egin zuten urtean hain zuzen, Euskal Ligako bigarren mailako hirugarren sailkatuak izan ziren. Ez dira beraz, aurkari erraza izanen, baina bidasotarrak ere indartsu daude.

Gizonezkoen senior mailako taldea ere kanpoan arituko da lehen jardunaldi honetan. Iruñeara joan beharko dira Txingudikoak, La Unica-ren bigarren taldearen kontra lehiatzera. Nafarroako Unibertsitate Publikoko zelaian jokatuko da partidua, igandean ere, 11:30ean. Talde iruindarra azken sailkatua izanen zen pasa den denboraldian, baina jokalari gazteak mailaz igo dira eta talde berritua dute. Horrela, indartsu aterako dira etxeko zelaira.

18 urtez azpiko taldea berriz, Plaiaundin ariko da Gernikaren kontra bihar, irailaren 30ean, 11:30ean. 16 urtez azpikoek atsedenaldia izanen dute, baina 14 urtez azpikoak ere etxean ariko dute Gipuzkoako azpiko errugbiko txapelketa jokatzen. Hauek ere larunbatean lehiatuko dira, 9:30ean. Txingudiko bi taldea ariko dira zelaian eta aurkari moduan, Bera Bera eta Hernani/Atletikoren bertze bina talde izanen dituzte.

Rugby eskolen topaketa Hondarribian

Honez gain, igandean (urriaren 1ean), Hondarribiko hondartzan denboraldi honetako Gipuzkoako errugbi eskolen lehen topaketa eginen dute. Errioxako, Arabako eta Nafarroako hamaika talde izanen dira bertan, eta guztira, 400 bat haur elkartuko dira 10 eta 12 urtez azpikoak.

Aritz Arrieta Euskadiko selekzioarekin

Txingudiko jokalaria den Aritz Arrieta Euskadiko 16 urtez azpiko selekzioaren deialdian sartu da bertze behin. Laugarren aldia da selekzioak topaketa egiten duela eta Arrieta ere bertan egonen da berriz ere.