Buruz buruko finalistetako bat (Altuna III edo Elordi) eta binakako atzelari txapelduna den Zabaleta izanen dira Irunen

Irungo bestei bukaera emateko, uztailaren 1ean, ohiko pilota jaialdia izanen da Uranzu frontoian. Betiko moduan, bi partida izanen dira 18:00etatik aitzinera, promozio mailakoa eta jaialdiko binakako partida nagusia. Azken honetan izanen dira buruz buruko finalistetako bat, Altuna III edo Elordi, eta aurtengo binakako atzelari txapelduna den Zabaleta.

Dario-Eskuza eta Salaberria-Bikuña bikoteek emanen diote hasiera Uztailaren 1eko jaialdiari. Promozio mailako partida jokatuko dute lau pilotariek 18:00etatik aitzinera. 20:00ak aldean berriz, partida nagusia ospatuko da. Bertan, Altuna III edo Elordi, Rezustarekin eginen dute bikote eta aurrez aurre izanen dituzte Ezkurdia edo Etxeberria, Zabaletarekin batera.

Jaialdirako sarrerak dagoeneko salgai daude www.entradasfronton.com webgunean. Hala ere, egunean berean erosteko aukera egonen da, partida baino ordu bat lehenago (17:00) irekiko den Uranzu pilotalekuko txarteldegian.

Borja Olazabal Irungo Udaleko kirol zinegotziak eta Inaxio Errandonea ASPEko arduradunak aurkeztu zuten Uztailaren 1eko jaialdia.